Ich Marchart der Chersperger Wilhalms sun von dem Stain und all mein erben und nachcho^emmen verjehen, daz wier gesezt haben aus unsrer nucz und gewer in dew iren unsern halben hof an dem Maidhartz hof der unser vreis aigen ist, gelegen in Newchircher pharr auf der Iph, den erbern geistleichen herren ze Glewnlich in dew oblay umb fumf und zwainczk phunt phenning wienner muncz mit allen eren und nuczen und rechten und dar zuc/e geho^ert alz von alter her chömmen ist, und schullen auch dez sacz ier gewer und verantwu^erter sein wo in dez no^et geschiecht nach landes recht ob der Ens also weschaidenleich, daz wier lasung haben auf unsrer vrawn tag alz si geparn ist var vierzehentag und hin nach vierzehentag. wer aber daz daz wier nicht lo^esten in den vier wachen alz vor geschriben stet, so schol ez albeg hin fu^er ein jar sten alz oft wier daz tu^en, wan wier aber lo^ezen ich oder mein erben oder nach cho^emen dew is durch recht tu^en schu^ellen zter zeit alz vargeschriben stet, so schol der dienst halber gevallen dem der da lo^est und halber den herren dew ze lo^ezen gebent. Daz dew red alle stet und unzebrochen weleib, daruber gib ich in den gegenwu^ertigen prief versigelt mit meim aygen anhangunden insigel, und zu ainer pezzeren sichherhait mit meir payder vetern Hainrichs des Cherspergers und Stephans seins pru^eders anhangunden insigel und mit meins o^echayms Janses dez Reiter anhangunden insigel. Der prief ist gegeben, da man zalt nach Christ gepu^erd dreiczehenhundert ja^er darnach im vier und symczisten ja^er an unsrer vra^ewtag alz si geparn ist.

Source Fulltext: OÖUB 8 (Wien 1883) S. 719f., Nr. 709