ICH Eberhardt von Capelln haubtmann zw Ennss unnd die zeit pfleger herrn Otte sälligen khindt von Volchhenstorff von Khreutz vergich, dass der ehegenandt erbar herr herr Ott sälliger von Volckenstorff geben hat ain guet genant zw Lanntzenberg gelegen in Hoffkhircher pfarr ob der Enns, das er vermaint es war im ledig worden von Ludweigen sälligen dem Dauchinger der es von ime hat zu lechen gehabt, unnd hat das geben durch Gott unnd durch sein seellhaill willen dem closter zu Pulgarn unnd der ehrwüerdigen geistlichen frauen frauen Elssbethn der Merswanckherin nach sag des brieffs den das closter zu Pulgarn von im darüber hat. da kham nach herrnn Ottn sälligen dott füer mich unnd meinen mann Friderich der Dauchinger des vorgenannten Lutwigs des Dauchinger sälligen sohn der des obgenanten guets zu Lantzenberg rechter erb was und der ausser lanndts gewesen ist als lanng alss man vermaint dass er war dott, unnd bracht das guett zu Lantzenberg mit rechtem recht wider inn sein gwalt als sein vätterlich erb, nun lauth der brieff den das closter zu Pulgarn und die frauenn daselbst von dem vorgenanten von Volckhenstorff haben uber das ehegenannt guett zu Lantzenberg, dass er und all sein erben desselben guetts ier gwern sollen sein nach sag desselben ieres brieffs den sy darüber haben, und sprachen mier auch zwe dass ichs aussrichten soll nach sag ieres ehegenannten briefs, unnd darumb so hab ich in füer das ehegenannt guett zu Lantzenberg gebetm nach ratt des ehegenannten herrn Ottn vonn Volckhenstorff khündt pesten freundt den hoff genannt der Khrüechbaumhoff gelegenn in Plassenstainer pfarr, der da dient ain pfundt plosser plening unnd der den khindern ledig wordtenn ist von Cunraten sälligenn dem richter zw Greyn, unnd den Edthoff zu Hartt gelegen in st. Valteins pfarr bey Altenhoffenn der da diennt ainen muth khornn, unnd daselbst zu Hardt bey dem O^etthoff ain halb pfundt pfening gelts vom uberlenndt also, das das ehegenannt closter zw Pulgarn unnd die ehegenannten frauen daselb nach dem ehegenannten guet zu Lantzenberg khain ansprach nimbermehr habenn sollenn. ich obgenannter Eberhart von Capelln hab inen auch die vorgenannten güetter unnd gült geben füer freys aygen ebigclich innezuhaben nutzen unnd zu niessen alss annder ier freys aygen unnd güetter ier gwer unnd ier scherm sein (sic) also, dass dem obgenannten closter zw Pulgarn unnd den frauen daselbst daran abgienng mit recht, dass sy das habenn sollen datz in und auf allem ierem guet nach sag des obgenannten ieres vatters brieff den sy von im haben. Unnd das das alles stätt unnd unzerbrochen beleibe darumb zu ainem wahrem sichtigen uhrkundte diser sach gib ich dem ehegenannten gottshauss zu Pulgarn unnd den frauen daselbst den brief versigilt mit meinem anhangundten innsigell, und sündt der sach getzeugen die erbaren herrn herrn Alber von Ottenstain der elter und herr Ortolf von Volckhenstorff, die der obgenannten khündt von Volckenstorff negst und pest freundt sündt. Geben zu Ennss an St. Pärtlmey tag des jahrs da man zalt nach Christy gebuert dreytzechen hundert jahre und darnach in dem fünfundsybentzigistenn jahren.

Source Fulltext: OÖUB 8 (Wien 1883) S. 774f., Nr. 752