Sanctissime pater. Dudum bone memorie Bernhardus et Albertus Patauiensis ecclesie episcopi attendentes monasterium sancti Floriani canonicorum regularium ordinis sancti Augustini dicte diocesis ex continua et intollerabili hospitalitate tam peditum quam equitum inibi transitum et placita sua facientium, quibus reuerenter secundum decenciam sui status et condicionis iidem canonici consueuerunt prouidere et necessaria ministrare prout ministrant, adeo fore grauatum, quod nisi ei oportuno succurrissent remedio, aut hospitalitatem reliquisset, aut ex huiusmodi oneribus inportabilibus grauibus debitis fuisset inuolutum et demolitum, maxime cum ipsum monasterium in metis versus Bauariam sit situatum et fere omnia placita cum ducibus Bauarie fiant ipsius monasterii sumptibus et expensis et propter tyrannidem laicorum circumsedentium et quendam aqueductum difficilem ad quinqua miliaria pro sustentacione canonicorum inibi domino famulantium et aliorum in eodem monasterio superueniencium redditus et prouentus monasterii irremediabiliter decrescunt et hactenus decreuerunt, dicti episcopi, premissis attentis et pie ac paterne consideratis, de sui capituli expresso consensu et voluntate pluribus prehabitis tractatibus seruatis seruandis ex certis iustis et rationabilibus causis ipsos mouentibus ecclesiam parrochialem in Ried dicte diocesis, in qua prepositus et conuentus monasterii predicti juspatronatus habebant, prout habent, auctoritate ordinaria dicto preposito conuentui et monasterio annexerunt incorporauerunt et etiam vniuerunt, prout in literis desuper confectis plenius continetur, successiue etiam bone memorie dominus Albertus episcopus Patauiensis nouissimus de sui capituli consensu praehabitis etiam pluribus tractatibus ex premissis et aliis rationabilibus causis ipsum mouentibus statuit et ordinauit pro oneribus predictis suportandis, quod rector parrochialis ecclesie in Waldkirchen dicte diocesis in qua prepositus et conuentus juspatronatus habent, quatuordecim libras vsualis monete perpetuis temporibus monasterio et conuentui predictis ministrare deberet, prout in literis etiam super hoc confectis plenius continetur, quas quidem annexiones incorporationes vniones constitutiones et ordinationes auctoritate ordinaria vt premittitur factas ad peticionem prepositi et conuentus predictorum bone memorie dominus Guido tituli sancte Cecilie presbiter cardinalis et apostolice sedis tunc in Alamannie partibus legatus confirmauit. Nouissime etiam Albertus episcopus Patauiensis, matura deliberatione prehabita de expresso consensu capituli sui dictis causis exigentibus concessit et potestatem dedit preposito et conuentui predictis licite tollendi leuandi et recipiendi perpetuis temporibus medios fructus et obuentiones primi anni in omnibus et singulis aecclesiis ad presentationem ipsorum prepositi et conuentus spectantibus et in dicta diocesi Patauiensi constitutis, tociens quociens eas vel earum aliquam vacare contigerit, prout de premissis patet ex legitimis documentis, ipsasque vniones incorporationes constitutiones et ordinationes seu illarum vigore ecclesiam predictam vnitam et pensionem huius modi dicti prepositus et conuentus a XL annis citra et ultra pacifice possederunt mediosque fructus aliquamdiu pacifice leuauerunt. Quare humiliter et deuote supplicatur Sanctitas vestra pro parte devotorum filiorum vestrorum prepositi et conuentus predictorum, quatenus eorum paupertati et anxietati compacientes paterno affectu dignetur e Sanctitate vestra cedentibus vel decedentibus rectoribus modernis ecclesiarum parrochialium predictarum ipsas ecclesias monasterio predicto de nouo vnire et incorporare cum omnibus juribus et pertinentiis earum, regendas et gubernandas per fratres siue canonicos monasterii antedicti, pensionem predictam et potestatem tollendi leuandi et recipiendi medios fructus predictos ex certa scientia, et de plenitudine apostolice potestatis misericorditer confirmare, supplendo omnem defectum etc. quibuscunque constitutionibus apostolice in contrarium editis nequaquam obstantibus et cum ceteris non obstantibus et clausulis oportunis vt in forma.

Source Fulltext: OÖUB 10 (Wien 1933) S. 27-29