Ich Vlrich der Liechtenegger vnd ich Elsbet sein hausfraw, herrn Vlrichs tochter seelig von Grienburgkh, vnd all vnser baider erben veriehen vnd thun kundt offentlich mit dem brief, allen den, die in sehend hörend oder lesend, die nu lebent vnd hernach kunftig sind, das mir mit gesambter handt vnd mit woll verdachtem mueth zu der zeit, da wir es wol gethun möchten, vnd nach rath vnserer negsten vnd pesten freundt recht vnd redlichen verkaufft haben vnsers rechten ledigen freys aigens vnser vestten Marbach, mit aller irer zuegehörung, als hernach geschriben stehet vnd die gelegen ist in der Riedtmarch, vnd^a) ailff pfundt vnd ain halbs pfundt vnd zwelff wienner pfenning gelts, die gelegen sind auf den nachgeschriben güettern gestiffter holden vnd auf dem vogtrecht, das alles zu der ehegenenten vestten Marbach gehört, von erst dacs Anczendorf auf das Aignerguet sechs halb pfundt pfenning, auf der Aignerin guet^b) achtzehen schilling pfenning, aufs Vlrichs Wexleins guett von Änczendorf zwelff schilling pfenning, auf der Hüdlmühl fünff schilling pfenning, auf Symons guet von Marbach sechzig pfenning, der Schneider daselbst auch mit seinem dienst von der Aw bey der Gusen sechs schilling pfenning, darnach die vogt pfenning dacs Riedtdorf acht pfenning vnd zwo hennen, dacs Aczendorf acht pfenning vnd zwo hennen, dacs^c) Thanndorff acht pfenning, dacs Graben acht pfenning vnd zwo hennen, von Lunkniz acht pfenning vnd zwo hennen, von Toberacken acht pfenning vnd zwo hennen, dacs Gusen vier vnd zwainzig pfenning, von Zwichern acht pfenning vnd zwo hennen, der Stin vier pfenning, der Murleich sechs pfenning, Gobl sechs pfenning, Nikla sechs pfenning, von der oberm Wibm acht pfenning vnd zwo hennen, vnd von ainer wisen auf dem Wagram vier pfenning, als wienner pfenning gelts, vnd alls das, das zu der ehegenanten vestten Marbach gehört, es sey baw wismadt waidt holz wiltban vischwaidt pawgärten oder wie das genandt ist, oder wo das gelegen ist, zu veldt vnd zu dorff, es sey gestüfft oder vngestüfft, versuecht oder vnuersuecht mit allen ehren nuzen vnd rechten, vnd haben jn auch verkaufft das kirchen lehen mit allen den ehren nuzen vnd rechten, die darzue gehörendt vnd das auch in der ehegenanten vestten Marbach gehört, nichts ausgenomen in deren obgenenter gülten vnd guet, dann allain alle rittermeßige lehen, die solten wir selbst leihen. Die obgenanten güldt vnd güetter, mit alle vnd die darzue gehört, so vorbenant ist, als wir das alles in aigens gehwehr vnversprechenlich vnz auf den heutigen tag jngehabt, vnd hergebracht haben, (haben) wier verkaufft vnd geben vmb sechs hundert pfundt wienner pfenning, der wir genzlich verricht vnd gewert sein, dem erbarn kneht Otten dem Feichter vnd allen sein erben, fürbass lediglich vnd freylich zu haben vnd allen irhen frumb damit schaffen verkauften verseczen schaffen machen vnd geben, wem sy wollen, ohne allen krieg vnd jrsall vnd zur pessern sicherhait so sezen wir vns der obgenanten vesten Marbach das kürchenlehen der gült vnd güetter, die dar zue gehörent mit allen ehren nuzen vnd rechten, als oben benant ist an den brieff, als wir das alles in nuz vnd gewehr herbracht haben, dem vorgenanten Otten dem Feichter vnd allen seinen erben zu rechten gewehr vnd scherm für alle ansprach, als aigens vnd des landts recht ist in Österreich. Gieng jhn aber daran jcht ab mit recht oder ob sy mit recht icht krieg oder ansprach daran gewinnen, mit wem das wer, das sollen wir jn alles ausrichten, vnd widerkeren gancz vnd gar, an allen jhren schaden, vnd sollen sy das haben, das wier obgenanter Vlrich von den Liechtenegger vnd das wir Elsbethen seiner hausfrawen vnd das allen vnsern erben vnuerscheidenlich^d) vnd dar zue auf allen den güettern, es sein erb güetter oder farende güetter, wie die genent sindt, die wir haben, oder noch gewinnen in dem lande zu Österreich, oder wo wir die haben, wir sein lebendtig oder todt. Vnd das der kauf vnd die Wandlung also fürbass genzlich stett vnd vnzerbrochen bleibe, so geben wir jn jch vorgenenter Vlrich der Liechtenegger vnd jch Elsbeth sein hausfraw den brieff besigelt mit vnser zwayen anhangenden insiglen, vnd der sach sein gezeugen die erbarn herren herr Eberhardt von Capeln, herr Rieger von Starchenberg, herr Hanns von Volcherstorf von Creiczen, herr Conradt von Liechtenegg, mein brueder, vnd herr Hainrich von Liechteneck, Peter Raspach auch mit jhren anhangenden insigln, die wir vleißigclich darumb gebetten haben. Geben an dem heilligen Auffarts tag vnsers herrn nach Christi geburt drevzehen hundert jähr vnd in dem zway vnd achtzigisten jahr.

Source Fulltext: OÖUB 10 (Wien 1933) S. 116-118