Wir Albrecht von Gots gnaden hertzog ze Österreich ze Steyr ze Kernden vnd ze Krain graf ze Tyrol etc. tun chunt vmb di aw, gelegen zwischen vnser stat ze Ens vnd Spilberg, darumb der probst ze sand Florian vnd vnser purger ze Ens in stozzen gewesen sind, daz wir dieselben stozz zwischen in abgenomen haben vnd haben selber, nach peder tail wizzen vnd willen, die egenante aw getailet vnd auzgetzaiget, also von dem Engenhaken entrichts gen Spilberg vber vnd dahin wier di gemerk in die drei pawm selber auzgetzaiget vnd gegeben haben, vnd daz der nider tail vnsrer egenanten stat ze Ens vnd der ober dem vorgenanten probst ze sand Florian bei dem Spilberg beleibe, vnd dauon, wie wier dieselben aw also auzgetzaiget haben, mainen wir, daz es furbas dabei beleibe an alle widerred. Mit vrchund dicz briefs geben ze Ens an Freitag nach dem Prehemtag nach Krists geburd dreuczehen hundert iar darnach in dem drein vnd achczigistem iare.||
Magister camerae de L.

Source Fulltext: OÖUB 10 (Wien 1933) S. 152-153