In Christi nomine amen. Anno natiuitatis eiusdem millesimo trecentesimo LXXXIII jndiccione VI. die vero XXIIII. mensis Maii hora nona uel quasi, pontificatus sanctissimi in Christo patris et domini nostri domini Vrbani diuina prouidencia pape VI. anno sexto. Jn mei notarii publici testiumque infrascriptorum presencia personaliter constitutus discretus vir Chrisogonus rector parrochialis ecclesie in Waltchirchen in Winberg Patauiensis dyocesis interrogatus et per venerabilem in Christo patrem dominum Stephanum prepositum monasterii sancti Floriani requisitus ad infrascripta respondit sibi legitime et euidenter constare et hactenus constetisse ex literis et instrumentis ac aliis autenticis predecessorum suorum et ipsius monasterii sancti Floriani canonicorum regularium ordinis sancti Augustini dyocesis predicte de et super annua pensione perpetua, quatuordecim librarum denariorum wyennensium, per quemcunque rectorem dicte parrochialis ecclesie in Waltchirchen pro tempore venerabili et religioso viro preposito et conuentui monasterii sancti Floriani predicti, legitime debita et singulis annis perpetue soluenda, publice fatebatur et sollempniter recognouit, se ad dictam pensionem soluendam fore obligatum, diuisim tamen in singulis quatuor temporibus anni tres libras cum dimidia, in cuius quidem pensionis recipiendi et habendi possessor tamquam ea legitime auctoritatibus debitis instituta hactenus dictus dominus prepositus et conuentus dudum fuerint, recognouit eciam sollempniter, se racione dicte sue ecclesie ad eiusdem pensionis solucionem temporibus predictis perpetue faciendam fuisse et esse debite astrictum et obligatum. Predictus igitur Chrisogonus nolens nomen ingrati assumere nec predictos dominos propositum et conuentum, patronos dicte sue ecclesie, in eorum pretensione quolibet perturbare, non ad hoc inductus vi metu alicuius persone nec errore iuris uel facti, sed dumtaxat iusta consciencia motus, de sua propria et spontanea voluntate, sine dolo et fraude supradictam pensionem per eum, quamdiu dictam ecclesiam haberet aut possideret uel fructus ex ea perciperet, soluendam in singulis quatour anni temporibus, vt prescriptum est, irreuocabiliter promisit et se ad hoc astrinxit et obligauit omni via modo jure et forma quibus efficacius debuit et potuit.||
Si vero dicta pensio in quolibet terminorum predictorum, ut premissum est, dictis dominis preposito et conuentui aut eorum procuratori vel nuncio soluta non fuerit, idem dominus Chrisogonus promisit, domino preposito predicto et conuentui in antea facere reficere soluere et integraliter resarcire omnia et singula dampna expensas et interesse, quas et que prefatus dominus prepositus et conuentus procuratores uel nuncii eorum ob defectum solucionis huiusmodi aut eius occasione quolibet facerent ac incurrerent, pro quibus omnibus et singulis obseruandis et firmiter adimplendis et obtinendis prefatus Chrisogonus obligauit dictis dominis preposito et conuentui omnia bona sua et dicte ecclesie sue mobilia et inmobilia tam habita quam habenda, que omnia bona jdem Chrisogonus nomine dictorum dominorum prepositi et conuentus se constituit iure precario pro predictis dominis preposito et conuentu possidere vsque ad integram solucionem dicte pensionis annis singulis et terminis prescriptis persoluende ac obseruacionem plenariam omnium premissorum, prout superius est expressum,||
quodque idem domini prepositus et conuentus aut procuratores uel nuncii eorum uel eorum aliquis possint et debeant ex nunc in antea bona sic obligata, in quibuscunque vel vbicunque consistant uel in futurum consistere poterunt capere vendere alienare distrahere et pignore obligare auctoritate propria, sine pena cuiuscunque iudicis ecclesiastici uel secularis aut quouis preiudicio dictorum prepositi et conuentus et suorum, et apud se retinere pro iusto et competenti precio insolutum et se seruare indempnes, et super expensis dampnis et interesse stare eorum aut alicuius eorum iuramento absque alia probacione tamen cognicione et judicis taxacione, renuncians expresse simul et diuisim in omnibus supra et infra scriptis excepcione doli mali accioni in factum, condicioni in debitis sine causa et ex iniusta causa, priuilegio fori conpetentis, omni tempore feriato et quadrimestri, omni appellacionis et prouocacionis remedio, omni conswetudini et statuto priuilegio clericalis noue et nouarum constitucionum iuris reuocandi dominii in integrum et cuiuslibet alterius beneficio restitutionis, donacioni libelli et presentis instrumenti copie et specialiter beneficio illius legis C. de reuocandis donacionibus promissionibus obligacionibus, iuris dicenti promissionem et obligacionem errorefactas non valere, nec non iuris dicenti confessionem extra iudicium factam non valere, omni judicis officii imploracioni, omnique alii accioni iuris et facti canonici et ciuilis, per que contra presens instrumentum uel factum in eo qualitercunque descriptum obici uel opponi possit, uel quomodolibet. veniri et specialiter iurisdicenti generalem renunciationem non ualere. Dictus que Chrisogonus iurauit ad sancta Dei ewangelia dictam pensionem dicto domino preposito et eius conuentui aut nuncio vel procuratori eorumdem supra dictis terminis, postquam fuerit super hoc requisitus, amnis singulis, vt premittitur, dare et soluere, nullas dilaciones querere nec non contrariam excepcionem opponere et contra omnia et singula premissa uel aliquid premissorum in aliquo nullo modo venire, Super quibus omnibus et singulis dominus prepositus ac Chrisogonus rector supradicti instanter supplicauerunt domino Tursoni rectori parrochialis ecclesie in Noua Ecclesia super Ypha dicte dyocesis, quatenus sigillum suum huic instrumento vnacum sigillo dicti Chrisogoni apponeret in maiorem cautelam et corroboracionem premissorum, requirentes eciam me notarium infrascriptum, quatenus ipsis super premissis conficerem vnum vel plura publica instrumenta. Acta sunt hec apud sanctum Florianum in cenaculo venerabilis in Christo patris domini Stephani prepositi monasterii sancti Floriani supradicti et coram eodem anno jndiccione mense die pontificatu hora et loco predictis presentibus honorabilibus et discretis.||
Et ego Vlricus Philippi de Chlagenfurt clericus Salczeburgensis dyocesis publicus apostolica et jmperiali auctoritate notarius dictus interrogacioni responsioni obligacioni iuris renunciacioni peticioni omnibusque aliis et singulis premissis, dum sic vt premttitur fierent et agerentur, vnacum prenominatis testibus presens interfui eaque sic fieri vidi audiui in notam recepi et ad requisicionem dictorum prepositi et Chrisogoni rectoris hoc presens publicum jnstrumentum confici, manuque mea propria scripsi signo et nomine meis solitis et conswetis signaui rogatus et requisitus in fidem testimonium et robur premissorum.

Source Fulltext: OÖUB 10 (Wien 1933) S. 185-188