Ich Marchart der Chersperger und mein hawsvraw Barbara und ich Andree der Chersperger wir paide prüder und alle unser erben, die wir yczund haben oder noch chumftichleich gewinnen, wir veriechen offenleich mit dem prieff allen denn, die in sechent oder hörent lesen, die nu sint oder noch chümftig werdent, daz wir unverschaidenleich miteinander nach rat unser nägsten und pesten vrewnt und mit gesamter hant zu der zeit, do wir daz mit recht wol getun möchten, recht und redleich verchauft und geben haben dem ersam gaistleichen herren brobst Stheffan und dem convent dacz sand Florian unsern hoff genant der Mawlhartz hoff gelegen in Hoffchircher pharr, der unser und unser vorvordern rechtes vreys aygen gewesen ist, ledichleich an alle erbevogtay umb ein gelt, des wir gancz und gar von in ze rechten tagen gericht und gewert sein. Wir haben auch daz obgenant gut geben auzz unsern nuczzen und gewer in ir nucze und gewer mit allen denn nuczzen eeren und rechten und dar zu gehörent oder do von bechomen mügen, wye daz genant ist, ez sey versucht oder unversucht^a), holcz veld wysmad wazzer und wayd in aller der mazze und rechten, alz wir ez von allter in aygens gewer herpracht haben. Ich obgenanter Marchart der Chersperger und mein pruder Andree und alle unser erben schullen und wellen dez obgenanten hoffs genant der Mawlhartzhoff und allez, des darzue gehört, als oben geschriben ist, des eegenanten brobstes und dez conventes dacz sand Florian recht scheerm und gewer sein für alle ansprach, wo in dez not und durft geschiet, als aygenz recht ist in dem lande zu Östreych ob der Ens und niderthalb der Ens. Wer aber daz, daz in do von icht chriegcz auffstünd oder irrsal von erbschapht oder lechnschapht wegen oder von welcher lay sach daz wer, von des hoffs wegen und dacz darzu gehört, alz oben geschriben ist, wie sich daz fügt mit recht, den schullen wir in auzrichten an allen iren schaden. Tätten wir dez nicht, wygetan schaden sy dez nämen, den der offtgenant brobst oder dez conventcz ayner pey seinner gewizzen gesprochen möcht, den selben schaden mit sampt dem hawptgut schullen wir in gänczleich abtun und widercheren, und schullen sy daz haben dacz uns und dacz unsern trewen unverschaydenleich und darzu auf f aller unser hab, di wir haben oder noch gewinnen, wo die gelegen ist oder swye die genant, und schol man in die in antwurten mit unsern gütleichen willen, der herczog in Österreich oder wer sein gewalt hat oder in welchez gepyet ez leyt, wir sein lemtig oder tod. Wer aber ymand under unsern erben oder nachchomen, der recht wold haben an dem eegenanten hoff und daz darzu gehört und wold dar nach sprechen, der scholl dem offt genanten gotzhaws dacz sand Florian geben dritthalb hundert phunt wienner phenning und schol sich dann dez hoffs underwinden. Daz in der chauff und die handlung von uns undallen unsern erben fürpazz also stat und unverchert^b) beleib, daruber geben wir Marchart und Andree Chersperger payd prüder in den offen prief f zu einem waren ewigen urchund versigelt mit unser payder anhangunden insigel und zu ayner pezzer sicherhayt und zewgnus mit unsers vetern Sthephans des Chersperger und unsers swechers Fridreychez dez Holczer anhangunden insigel; auch hab wir gepeten den erbern herren hern Seyboten von Volchenstorf, daz er der sach und dez handelz zeug ist mit seinem anhangunden insigel, in und seinen erben an schaden. Geben nach Christi gepurd drewczehen hundert iar darnach in dem syben und achczigisten iar an sand Agathatag.

Source Fulltext: OÖUB 10 (Wien 1933) S. 422-423