Wir prüder vnd swester, die in di zech gehörnt der lieben vnser Frawn ze Schöndorff, verjehen vnd tun chund offen leich an dem prif allen, den er für chumt, die in sehent oder hörnt lesen, das wir mit wolbedachtem vnd veraintem mut vnd gutleichen willen vber ain sein warden durch fräwden vnd salichait vnser lembtigen vnd hail vnd trost vnserer voruodern vnd vns vnd vnsern nachchomen söligen selen, das wir wellen vnd mainen, welher prüder oder swester in vnser zech stet oder ist, derselbig oder dieselb sullen all Chottemer geben an als vercziehen dem zechmaister, der dieselb zeit zechmaister ist inn der obgenanten zech, sein gesacztes recht, was er die selb zeit dann geben sol. Wär auer, daz er daz jar liezz vergen vnd sein gesacztes recht nicht ausrichtet, so sol er ab geschriben werden aus der zech vnd sol sein versezzens gelt geben; da schull(en) wir in all zu nötten. Auch sey(n) wir vberain warden, wenn das ist, das vnser ains pruder oder swester aus der zech sterben, ist es ein pruder, es sey purger oder purgärin oder inn der stat gesezzen, es sey pruder oder swester, derselb oder diselbig sullen di cherzen, die in vnser zech gehörnt, herab pringen von vnser Frawn in di stat vnd sullen wir prüder diselben cherzen prynund vor der leich tragen vnd auch wir prüder sullen di par mit dem leich nam tragen zu der chirichen vnd zu dem grab. Ist es aber ein lediger pruder oder ein ledigew swester in der stat ge sezzen, so sol vnser zechmaister die cherzen selb herab inn die ||
stat pringen mit der prüder hilff vnd sullen di prüder die cherczen vnd die par tragen zu der chirichen vnd zu dem grab, als oben geschriben ist. Wär es aber ein pruder oder ein swester, der auf dem gäw gesezzen war, dem mag man di cherzen ze haws vnd ze hof nicht bringen, auer inn der chirchen sol man di cherczen zu der leich stekchen prynnund vnd wir prüder sullen den leichnam zu dem grab pringen vnd schullen wir all prüder vnd swester, di die selb zeit anhaim sind, gemainchleich an gevär miteinander gen chirchen gen vnd ophern vnd der leich andächtichleich pey gesten, als oben geschriben ist. Stirbt auer vnsrer chinder ains aws der prüderschaft, dem sol man vnserer cherczen sechs zu der leich stekchen. Stirbt auer vnserr gedingter chnecht oder gedingtew dirn, den sol man vir cherczen zu der leich stekchen vnd sull(en) wir all pruder vnd swester den leichnam aus der zech gestorben trewleich pey gesten an gevär. Auch ist ze merkchen, wenn vnsrer ains pruder oder swester oder vnsrer chinder oder vnsrer gedingter chnecht oder diennär oder ge dingtew dirn aws der zech stirbt, das sol dann dez selben herr oder fraw oder wirt aus dem haws gestorben vnserm zech maister ze wissen tun. So sol dann der selb vnser zechmaister vns prüdern vnd swestern in der stat gesezzen von haws ze haws vns chund tun vnd sull(en) wir den leichnam gen chirchen tragen mit gesankch vnd mit vnsern prynunden cherczen vnd den leichnam erbärleich pestatten vnd peygesten, als oben geschriben ist, an als gevär. Wenn auch das ist, das vnsrer ains pruder oder swester in der stat oder vmb di stat gesezzen aus der zech stirbt, demselben oder derselbigen sol mans pegen vor dem dreygsysten mit einem gesungen selampt vnd mit zwain gesprochen messen vnd sullen denn vnser cherczen all zu denselben werden aufgeczunt pey der par, als ob der leichnam gegenwürtichleich dastünd. Wär es dann vnser pruder oder swester aws dem lant oder in dem lant ge sessen, der sein gesacztes recht in di zech all jar järleich ze rechter zeit ausricht, dem oder der sol mans dann pegen, wenn man seines todes inn wirt, als vor zenachst geschriben ist, vnd sol der zechmaister dem pharrer von den drin mezzen geben zwen vnd dreygst phening. Es sol auch dann diselb zeit vnser zechmaister zu dem pharrer gen, auf welchew zeit er der obuerschribnen drey mezz vor dem dreygstysten müg perait sein; daz selb sol man dan chunden dez Suntags auf dem lekär ze vnser Frawn zu Schöndorf, daz wir vns prüder vnd swestern wissen darnach ze richten vnd pey dem goczdinst peleiben vnd peygesten derselben sel ze hilff vnd ze trost andächtichlich an gevär. Auch sol man vns prüdern vnd swestern all Suntag vnd Veyrtag, so man predigt ze vnser Fraw ze Schondorf, derselb herr ain Pater noster vnd Ave Maria chunden vnd frummen vns lembtigen vnd toten vnd waz wir von der zech wegen ze reden haben, daz sol der selb herr vnd singer auf dem lekker vnser Frawn tun vnd sol im darüber vnser zechmaister aus vnser zech geben all Chottemer zwelif phening. Es sol auch der mesnär daselbs vns all tag tägleich vnsrer cherczen ainew, da si stekchet an irer stat, auf zunten; zu der mezz dez Suntags sol er zwo aufzünten; denn zu allen heyligen zeiten, so man di Zwelifpoten cherczen auf zünt, so sol der mesnär vnser cherczen mit der prüder hilff denn all aufzünten; vnd darumb sol im geben vnser zech maister all chottemer dreyphening. Wir sein auch vberain warden, das vns vnser pharrer ze vnser Frawn zu Schöndorf sol pegen all jar jarleich einen jartag ze hail vnd ze trost vns lembtigen vnd toten in der nachsten wochen vor der heyligen Phingstag, auf welchen tag in derselben wochen der pharrer den jartag haist chunden, daz sol vnser zechmaister dem pharrer vor ze wissen tun, dez nachcz mit einer vigilig vnd dez morgens mit acht mezzen, zway gesungenew ampt ains von vnser Fraw daz ander von den selen vnd sechs gesprochen mezzen, vnd sol der messnär daselbs mit der prüder hilff vnser cherczen all dez nachcz vnd dez morgens zu der par tragen vnd aufzünten vnd sullen wir all prüder vnd swester, di die selbzeit anhaim sind, gemainchlich gen chirchen gen vnd andächtichleich pey den messen stan mit vnserm opher vnd petten ze hilff vnd ze trost vns lemtigen vnd toten, die in der zech sind oder daraus gestorben sein. Daruber sol vnser zechmaister aus vnser zech dem pharrer daselbs geben ain phunt phening, da sol er sein gesellen vnd den capellan vnd den schulmaister vnd den mesnär von ausrichten als gewondleich ist. Vns sol auch vnser zechmaister all jar järleich zu den Weinachten wider raitten. Mit vrchund dez offen prifs versigelten mit dez erbern herrn herren Hansen dez Polhaymer ze Wartenwurch vnd mit herren Chunrat dizeit vnser pharrer zu vnser Frawn ze Schondorf vnd mit Vlrich dez Pruknär dizeit statrichter zu Veklapruk vnd mit Wernharcz dez Chocheysen dizeit dez rates ainer vnd purger daselbs, di vir ir insigel an den prif gehangen habent durch fleizziger pet willen in vnd allen irn erben an schaden. Der prif ist geben nach Christi gepurd drewczehenhundert jar darnach in dem ains vnd newnczkisten jar an der heyligen drey Chuningtag.

Source Fulltext: OÖUB 11 (Wien 1983) S. 1-4