BONIFACIUS episcopus seruus seruorum Dei dilectis filiis preposito et conuentui monasterij sancti Floriani per prepositum soliti gubernari ordinis sancti Augustini Patauiensis diocesis salutem et apostolicam benedictionem. Magne deuocionis affectus, quem ad nos et Romanam geritis ecclesiam, promeretur, ut uotis uestris illis presertim, que commodum et utilitatem uestri monasterij respicere dinoscuntur, quantum cum Deo possumus, fauorabiliter annuamus. Exhibita siquidem nobis nuper pro parte uestra peticio continebat, quod, licet olim in Vekclapruk cum hospitali pauperum sibi annexo ac in Ryed et in Waltchirichen parrochiales ecclesie Patauiensis diocesis, que de iure patronatus eiusdem monasterij uestri existunt, monasterio prefato ex certis racionabilibus causis auctoritate ordinaria incorporate canonice fuerint, tamen incorporaciones ipse siue per uestram siue aliquorum predecessorum uestrorum in eodem monasterio negligencia seu alias interrupte dicuntur uosque eciam dubitatis incorporaciones ipsas ex certis causis non ualere. Quare pro parte uestra nobis fuit humiliter supplicatum, ut easdem ecclesias, quarum centum predicto monasterio, cuius trecentarum marcharum argenti fructus redditus et prouentus secundum comunem extimacionem ualorem annuum, ut asseritis, non excedunt, de nouo annectere unire et incorporare de speciali gracia dignaremur. Nos igitur, ut incumbencia uobis onera magis accommode supportare ualeatis, de alicuius subuencionis auxilio prouidere uolentes huiusmodi uestris in hac parte supplicacionibus inclinati prefatas ecclesias cum omnibus iuribus et pertinencijs suis predicto uestro monasterio auctoritate apostolica imperpetuum incorporamus annectimus et unimus ita, quod cedentibus uel decedentibus dilectis filijs ipsarum ecclesiarum rectoribus, qui nunc sunt, uel alias ipsas ecclesias quomodolibet dimittentibus liceat uobis earundem ecclesiarum corporalem possessionem libere apprehendere et licite retinere omnesque fructus redditus et prouentus huiusmodi ecclesiarum prefatarum in supportacionem onerum predictorum et usus uestros conuertere, dyocesani loci et cuiuslibet alterius licencia super hoc minime requisita, ia tamen, quod diuinus cultus in eisdem ecclesijs propterea non minuatur quodque etiam ecclesias ipsas et curam animarum perrochianorum earundem per ydoneos canonicos dicti monasterij ad solum nutum prepositi pro tempore dicti monasterij per prepositum soliti gubernari ponendos et canonicos ipsos ad claustrum eiusdem monasterij reuocandos et alias ammouendos regi facere ac episcopalia iura soluere et alia onera rectoribus pro tempore ipsarum ecclesiarum et earundem ecclesiarum accasione incumbencia in omnibus teneamini supportare non obstantibus constitucionibus apostolicis et alijs contrarijs quibuscunque. Seu si aliqui super prouisionibus sibi faciendis de huiusmodi parrochialibus ecclesijs uel alijs beneficijs ecclesiasticis in illis partibus speciales uel generales apostolice sedis uel legatorum eius litteras impetrarint, eciam si per eas ad inhibicionem reseruacionem et decretum uel alias quomodolibet sit processum, quasquidem litteras et processus per eas habitos ad easdem parrochiales ecclesias uolumus non extendi, sed nullum per hoc eis quo ad assecucionem parrochialium ecclesiarum aut beneficiorum aliorum preiudicium generari et quibuslibet priuilegijs indulgencijs et litteris apostolicis generalibus uel specialibus, quorumcunque tenorum existant, per que presentibus non expressa uel totaliter non inserta effectus earum impediri ualeat quomodolibet uel differri et de quibus quorumque totis tenoribus habenda esset in nostris litteris mencio specialis. Nos enim exnunc irritum decernimus et inane, si secus super his a quoquam quauis auctoritate scienter uel ignoranter contigerit attemptari. Nulli ergo omnino hominum liceat hanc paginam nostre incorporacionis annectionis unionis constitucionis et uoluntatis infringere uel ei ausu temerario contraire. Siquis autem hoc attemptare presumpserit, indignacionem omnipotentis Dei et beatorum Petri et Pauli Apostolorum eius se nouerit incursurum. Datum Assisij Kl. Septembris pontificatus nostri anno quarto.

Source Fulltext: OÖUB 11 (Wien 1983) S. 200-202