Ich Alhait deu Hosmuntinne Purigerinne ze Paszawe, Ich wernhart der Smerchubel ir Aidem vnd ich Elspet sein hausurawe veriehen vnd tun chunt an disem prief allen den, di in sehent lesent oder horent lesen, di nu lebent vnd hernach chunftich sint, Daz wir vns reht vnd redleich in offener Schranne ze Paszawe vor dem erberm manne hern ulrich dem Sokkinger zv den zeiten Rihter vnd vor den erbern Purigern furziht getan hawen Ains Weingorten, des ain drittail eins jeuchs ist, leit ze Neunburch am Aychweg zenaechst Gundolts Weingorten in der Walichgazzen, den wir reht vnd redleich verchauft hawen dem erbaerm manne Chunrat dem Chreutzer Puriger ze Neunburch vnd seiner hausurawen vraen Gedrauten vmbe fumftzich pfunt pfening wienner munsze, der seu vns gor vnd gaentzleich gewert hawent. auch haben wir vns verpunden vnd hawen gelobt mit vnsern trewn vnuerschaidenleichen, Daz wir des egnanten Weingorten Chunrat des Chreutzer, seiner hausurawen vraen Gedrauten vnd ir paider eriben reht gewern vnd scherm sein suln fur vns vnd fur alle vnser eriben vnd fur alle ansprache. Naemen seu darvber des selben Weingorten furbaz dehainn schaden, von welcherlaye ansprache daz wer, den si pei irn trewn gesagen mugen, den suln wir in an allen chrieg ablegen vnd suln seu daz hawen auf vnsern trewn vnd auf alle deu, daz wir hawen, wo wir iz hawen. Des geben wir in disen prief zv eim worn zeug versigelten mit hern vlrich des Sokinger jnsigel zv den zeiten Rihter ze Paszawe. Der Prief ist geben ze Paszawe nach Christes gepurt Dreutzehen Hundert iar, darnach in dem Neun vnd Dreizzigstem jar an sande Merteins tag.

Source Fulltext: OÖUB 6 (Wien 1972) S. 311, Nr. 306