Ich Peter der Hersinger vnd ich Anna sein hausfraw veriehen fur vns vnser eriben vnd fur all vnser frewntschaft vnd tun chunt offenleich mit dem brief allen, den er fur chumpt, vmb dew ordenung des geschef ftes, so vnser lieber en Vlreich Maulhart vnd vnser lieber sweher vnd vater Hainreich Vol von Ibs vnd vnser vater vnd sweher Peter der alt Hersinger, den allen Got genad, hinder in lazzen haben vnd durch Got vnd hail willen irr sell vnd auch zehilf vnd zetrost irr vodern vnd alln gelaubigen selen geschaft vnd geordet habent, alz wir dasselb irr geschefft an den brief her nach wol bedewten vnd lewtern wellen, waz vnd wie ir ygleicher geschafft hat vnd vmb alles daz sain irr ygleicher geschaft hat an dem spital zu Ens vnd was si brief dar vber geben habent, dye wir in gehabt haben, dy selben brief all, die da lauttent dem spitall vber daz geschefft, alz si tan ha bent, dy selben brief, was wir der haben in gehabt haben wir ingeantwurt vnd geben den burgern czu dem spital czu Ens durch daz, daz ir yggleichs geschefft vnd ordnung, so an dem brief hernach geschriben stet, dez der vollicleicher crafft vnd furganck hab in der mazz, als sie geschaft vnd gegeben haben. Wer aber, daz wir vnser eriben oder vnser frewntschafft hin fur icht brief in vnser gwalt funden vnd herfür chämen, dy da sagten vber dew güter, so ir ygleich czu dem spital geschafft vnd geben hat, dy sullen all den spital cze frum vnd nucz chomen vnd vns vnser eriben vnd vnser frewntschafft chain chrafft nicht haben.||
Vnd haben vnsern willen dar czu geben vmb alles das geschefft, so vnser en Vlreich Maulhart czu dem newn spital czu Ens getan het, dasselb ist mit unserm willen abgenumen vnd gelegt worden czu dem alten spitall czu Ens, also daz dew burger vnz vnd vnsern eriben vnd aller vnser frewntschaft daz recht gegeben habent, sechs pet czu uerleyhen in dem spital cze Ens vnd daran inzenemen arm lewt durch Got, dew sein durftig sein, den man dew phründ von dem spital geben vnd raichen sol alz andern arm lewten, dye dar inn sind, vnd alz offt der armen lewt ains abget, alz offt mügen wir ain anders ingenemen, swan daz cze sulden chumpt vnd sol dez der spitalmaster noch dew burger nicht wider sein. Wer aber, daz wir vnser eriben vnd vnser freuntschaft ab gingen, so sol sew ain spitalmaster leyhen, alz er dew andern pett leicht, dy in dem spital sind, vnd sol dew selben pett allzeit leihen, wer der eltist erib vnder vns ist, vnd dar nach der eltist f rewnd, swan dew eriben abgangen sind.||
Dann vmb daz geschefft, so vnser lieber sweher vnd vater Hainreich der Vol und Lucey sein hausfraw czu dem spital geschaft vnd geben habent von erst den hoff gelegen ze Larch genant der Kesselhoff, der aller sach järleich fümf phunt gelcz ist vnd ist freyz aygen, vnd ain akker gelegen ze Ens in der Nidern Scheyben, da man järleich von geit ze purckrecht dem richter ze Ens ins herczogen puchsen vier pfening vnd in das spital cze Ens vier pfenig, vnd ain gütel cze Tesselprunn, daz fumf silling gelcz ist, daz habent si geschafft dem vorgenanten spitall in der beschayden, daz dew burger oder wer daz spital inne hat, alle iar ewicleich davon raichen vnd geben sol am Montag nach sand Katrein tag ein ysleichen capplan des spitals czu Ens ain phunt phenning, dar vmb der selb capplan mezz sprechen vnd hincz Got ir vnd ir vadern sel gedenchen sol, vnd dar czu sol ain spitalmaster geben all iar iarleich Hainrich des Vollen nachsten vnd eltisten eriben ainem vierzehn silling phenning, da mit der selb | erib iren jartag sol begen dazz denn brüdern vnd dacz der pharr czu Ens am Suntag nach sand Katrein tag des nachtes mit vigily vnd des morgens mit dem selampt, vnd sol der erib dew selben vierzehen silling phenig geben also hincz den brüdern ain halphunt vnd den briestern czu der vigily czu der pharr sechczig phenning vnd vnder der vigily sechczig phenning arm lewten durch Got vnd sechczig phenning vmb prot czu dem oppher vnd sechczehen phenning vmb wein vnd dem, der daz prot vnd den wein trayt gen der pharr, vier phenning vnd dem messner dacz der pharr vier phenning vnd dem chorschuler vier phenning vnd in ellender lewt czech sechczig phening vnd dem zechmaster, der dew cherzen dar leicht, vier vnd czwainczig phenning, vnd wann der erib di selben vierczehen silling phening also vodert an dem spitalmaster dreyr tag oder vier vor dem jartag, so sol er vns geben an uerczog. Auch so sol ain spitalmaster ewicleich alle wochen am Sampcztag den sihen in das spital geben czehen phenning vmb fleisch vnd dar vmb, daz ain spitalmaster daz also raichen vnd geben sol in der mazz, alz ez vor geschriben stet, so sol er im behalten sechczig phening für sein mue vnd dew vbertewrung vber daz gelt sol pey dem spital beleiben vnd sullen auch dew obgenanten guter mit irr czugehorung ewicleich pey dem spital vnuerchumert peleiben. Ez wer dann alsvil, ob ein spitalmaster alle iar iarleich daz gelt also nicht enraicht vnd geb, alz vor geschriben stet, so mag sich ysleich zechmaster, wer ye czechmaster ist der pharr czu Ens, der obgenanten guter vnd ir zugehoren wol vnterwinden vnd vndercziehen vnd daz obgenant gescheft vnd jartag auzrichten in der mazz, alz vor begriffen ist, da mit ez hinfür stet vnd pleybleich sey.||
Auch vmb dew Ordnung dez gescheffts vnd selgerätz, so vnser lieber vater vnd sweher Peter der alt Hersinger czu dem spital czu Ens getan hat, alz hernach an dem brief begriffen ist, von erst hat er geschafft czu dem spital den hoff zu Barbach vnd czwo seld do selbs mit ir czugehorung, daz freiz aygen ist vnd aufs ringist sechs phuntz gelcz ist, das hat er dar czu geben durch Got vnd hail willen seiner sel in der beschaiden, daz ein ygleich spitalmaster dem eltisten vnd nachsten seiner eriben ainem alle iar ewicleich raichen vnd geben sol vierczehen silling phening, da mitt der selb erib alle iar seinen iartag ausrichten vnd begen sol dacz den pruedern vnd dacz der pharr cze Ens am nachsten Suntag nach sand Merteins tag des nachtes mit vigily des morgens mit dem selampt, vnd sol dew selben vierczehen silling phenning tailen vnd geben ain halphunt hincz den bruedern sechczig phenning den herren czu der vigily gen den pharr vnd vnder der vigily sechczig phenning arm lewten durch Got vnd vmb prot czu dem oppher sechczig phenning vnd vmb oppherwein sechczehen phenning vnd dem, der das prot vnd den wein gen der pharr tret, vier phenning dem messner dacz der pharr vier phenning vnd dem chorschulär vier phening vnd dem czechmaster, der dew cherczen dar leicht, vier vnd czwainczig phenning vnd sechczig phenning in ellender läwt zech vnd swan der selb erib dew vierczehen silling phening vodert an ain spitalmaster dreyr tag oder vier vor dem iartag, so sol er vns geben an uerczug. Auch sol ain spitalmaster ewicleich alle iar raichen vnd geben den sichen in dem spital dritthalb phunt phenning vmb hering czu der vasten vnd sol geben an die sechs pett, die Vlreich Maulhart dem spital ze Ens gestifft hat, den armen lewten dar an ir ygleichen zehen phenning in der ersten vastwochen vnd sol darnach raichen vnd geben alle iar dem conuente des gotzhaus cze Slirbach ain halphunt phening, wann si in den nachsten achttagen vor dem iar tag daz an in vodert vnd dar nach senten, so sol er ins an uerczog geben, dar vmb si am Suntag nach sand Merteins tag des nachtes mit vigily des morgens mit dem selamp Petreins des alten Hersinger vnd seiner vodern gedechtnuz haben sullen. Vnd vmb das, daz der spitalmaster daz alles ausricht vnd volfür in der mazz, alz vor geschriben ist, so sol er im behalten sechczig phenning fur sein mue vnd dew vbertewrung vber daz gelt sol pey dem spital beleiben vnd der selb hoff czu Rorbach vnd dew czwo seld mit irr czugehorung sol ewicleich vnuerchumert bey dem spital beleiben. Ez wer dann alz vil, ob ein spitalmaster saumig wer vnd nicht alles daz alle iar iarleich volfuret vnd volprecht in der mazz, alz es vor an dem brief Peter der alt Hersinger gemaint vnd geschafft hat, so sol vnd mag sich der eltist sein nachster erib des obgenanten hoffs vnd der selden vnd ir czugehorung wol vnderwinden vnd vnderzihen vnd antburten czu dem gotzhaus gen Slirbach. Wer aber, daz die selben sein eriben abgingen vnd daz geschefft, so er tan hat, alle iar iarleich nicht auzgericht vnd volfürt würd in der mazz, alz oben geschriben stet, so mugen vnd sullen sich dy frawn von Slierbach oder irr gewalt des selben hoffs vnd der selde mit aller czugehorung selber wol vnderwinden vnd vnderczihen an clag vnd an alz recht, also daz daz geschefft vnd dew ordenung, so Peter der alt Hersinger vor an dem brief getan hat, ewicleich alle iar iarleich also auzgericht vnd volfurt werd.||
Vnd daz daz geschefft vnd dew ordnung, so dew obgenanten drey vnser lieber en Vlreich Maulhart vnd vnser lieber sweher und vater Hainreich Vol Lucey sein hausfraw vnd vnser lieber vater vnd sweher Peter der alt Hersinger, den allen Got genad, geschafft vnd gegeben haben czu dem vorgenanten spital vnd hinfur also chrafft vnd furgang hab vnd also da pey peleiben sol, alz daz dew burger der stat zu Ens mit ir stat grossen insigel vnd mit irem brief vber daz geschefft also bestät habent, alz daz ir brief laut, den si darvber geben habent, vnd daz daz selb geschefft, so obem an dem brief geschriben stet, genczleich vnser will sein sol vnd ist, des geben wir den gegenwurtigen brief besigelt mit meins obgenants Petreins des Hersinger anhangundem jnsigel. Vnd der sach ist gezeug durch vnsern fleyssigen pet willen vnser lieber aydem Hans von Munspach vnd Wolffart der Gelwaycz ze Ens mit iren anhangundem jnsigel irr payden vnd iren erben an schaden, darvnder ich mich obgenante Anna Petreins des Hersingers wirtin czusampt meim wirt mit mein trewn verpind alles das stet zehaben, das vor an dem brif geschriben stet. Der brief ist geben, do man zalt von Cristi gepurd tawsent iar drewhundert iar vnd in dem newnczigistem iar an Freytagen vor sand Elsbeten tag.

Source Fulltext: OÖUB 10 (Wien 1933) S. 645-649