Bonifacius episcopus seruus seruorum Dei. Dilectis in Christo filiabus abbatisse et conventui monasterii sanctimonialium sancte Marie in Slirwach Cistericensis ordinis Patauiensis diocesis salutem et apostolicam benedictionem. Magne devotionis affectus, quem ad nos et Romanam geritis ecclesiam, promeretur ut ea uobis fauorabiliter concedamus, que uestris et monasterii uestri utilitatibus conspicimus expedire. Hinc est, quod nos uestris supplicationibus inclinati ac in relevamen onerum pro tempore, que uos subire oportet, de alicuius subventionis auxilio prouidere uolentes sancti Gregorii in Kirchdorf et sancti Kiliani in Wartberg Patauiensis diocesis parrochiales ecclesias olim dicto monasterio ordinaria auctoritate unitas et incorporatas, quas ex certis causis iuribus non subsistere timetis, que de iure patronatus predicti monasterii existunt et quarum viginti, cum omnibus iuribus et pertinentiis suis eidem monasterio, cuius quinquaginta marcharum argenti puri fructus redditus et prouentus secundum communem extimationem ualorem annuum, ut asseritis, non excedunt, auctoritate apostolica perpetuo incorporamus annectimus et unimus, ita quod cedentibus uel decedentibus dilectis filiis sancti Gregorii in Kirchdorf ac sancti Kiliani in Wartperg ecclesiarum predictarum rectoribus aut alias ipsas quomodolibet dimittentibus possitis per uos uel alium seu alios corporalem possessionem earundem ecclesiarum auctoritate propria apprehendere ac nancisci necnon retinere perpetue in usus uestros proprios ac sancti Gregorii in Kirchdorf necnon sancti Kiliani in Wartperg ecclesiarum predictorum fructus redditus et prouentus in supportationem conuertere pro tempore onerum predictorum ac etiam deputare diocesani loci ac cuiuslibet alterius consilio uel assensu super hoc minime requisito ita tamen, quod curam animarum sancti Gregorii in Kirchdorf et sancti Kiliani in Wartperg ecclesiarum predictarum per ydoneos presbyteros seculares ad nutum abbatisse pro tempore existentis dicti monasterii ponendos duntaxat et remouendos gubernari et in eisdem ecclesiis in diuinis obsequiis laudabiliter deseruire faciatis solitusque in eis ministrorum numerus nullatenus minuatur iuraque episcopalia persoluatis et supportetis sancti Gregorii in Kirchdorf et sancti Kiliani in Wartperg ecclesiarum huiusmodi onera consueta, non obstantibus tam felicis recordationis Alexandri pape III. et IV. ac Bonifacii VIII. predecessorum nostrorum quam aliis constitutionibus apostolicis nec non statutis et consuetudinibus monasterii predicti et Cisterciensis ordinis, sub quo in eodem monasterio estis iugo dominico mancipati, quibuscumque contrariis iuramento confirmatione apostolica uel quocumque apostolica firmitate alia roboratis, seu si aliqui super prouisionibus sibi faciendis de huiusmodi parrochialibus ecclesiis uel aliis beneficiis ecclesiasticis in illis partibus speciales uel generales nostras uel predecessorum nostrorum Romanorum pontificum aut legatorum sedis apostolice literas impetrarint, etiam si per eas ad inhibitionem reseruationem et decretum uel alias quomodolibet sit processum, quas quidem litteras et processus habitos per easdem ad sancti Gregorii in Kirchdorf et sancti Kiliani in Wartperg ecclesias predictas uolumus non extendi sed nullum per hoc eis quoad assecutionem parrochialium ecclesiarum aut beneficiorum aliorum preiudicium generari et quibuscunque litteris indulgentiis et priuilegiis apostolicis generalibus uel specialibus, quorumcunque tenorum existant, per que presentibus non expressa uel totaliter non inserta effectus earum impediri ualeat quomodolibet uel differri et de quibus quorumque totis tenoribus de uerbo ad uerbum haberi debeat in nostris litteris mentio specialis. Volumus autem et auctoritate predicta decernimus, quod per nostras aut successorum nostrorum Romanorum pontificum, qui erunt pro tempore, ordinationes siue reuocationes aut collationes generales vnionum parrochialium ecclesiarum siue aliorum beneficiorum ecclesiasticorum quorumlibet ecclesiis uel monasteriis siue aliis beneficiis ecclesiasticis quibuscunque eadem auctoritate factorum, que tunc effectum secute non fuerunt, siue sub quibusuis tenore seu forma uerborum forsan edendas siue faciendas presentibus nullatenus derogetur, nisi de illis de uerbo ad uerbum specialis et expressa et nominatim in ordinationibus reuocationibus siue cassationibus ipsis mentio habeatur. Et insuper ex nunc irritum decernimus et inane, si secus super hiis a quoquam quauis auctoritate scienter uel ignoranter contigerit attemptari. Nulli ergo omnino hominum liceat hanc paginam nostre incorporationis et voluntatis infringere uel ei ausu temerario contraire. Si quis autem hoc attemptare pressumpserit indignationem omnipotentis Dei et beatorum Petri et Pauli apostolorum eius fuerit incursurum. Datum Rome apud sanctum Petrum Nonis Julii pontificatus nostri anno vndecimo.||
Gratis de mandato domini nostri papae. A. de. Severle.

Source Fulltext: OÖUB 11 (Wien 1983) S. 839-842