"Ich Hainrich von Schowenberch(1) tvon allen den chvnt, di disen brief vernement, daz Salman von Lvdweigsdorf(2) vnd ander sin frivnd, di erben wolten sin des hofes datz Melme(3), den selben hof so lang angesprochen habent for minen rihtern, daz div chlag gewuchs fvor mich, do chom probst Rveger(4) von dem Slag fuer vnd verantwurtet den selben hof vnd behabt in for mir mit erwerigen gezivgen, als verr mit dem rehte, daz im ewo ertailet wart von dem forgenanten Salmann vnd andern erben, di dar nah sprachen oder noh sprechent wurden. Daz ovch daz chloster datz dem Slag furbaz gerowet beleib for aller ansprache ovf dem forgenanten hof datz Melme, dar vber gib ich ze vrchvnd disen brief versigelten mit minem jnsigel. Des sint gezivg her Hærtnid vnd her Rvdolf von Liehtenwinkchel(5), her Rvdolf Schifer(6), her Hærtwik ab dem Strahen(7), her Vlrich von Lvdweigsdorf(8), her Fridrich der pfarrær von Ort(9), Wern von Poksrvkk(10), Eber von Winnberg(11), Wern von Rotenvels(12), Wernher Cheltz(13), vnd ander biderb levte. Der brief ist geben, do von Christes geburt waren tovsent jar, zwai hvndert iar, in dem nivn vnd ahtzigistem jar, an sancti Bartholomei tag."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 31 (S 20), S. 50-51