"Ich, Herbord(1), Herborts sun von Winchel(2), vnd ich Elspeth(3) sein housfrowe, wir veriehn vnd tun chunt allen den di disen brief an sehnt oder heorent lesn di nu lebent vnd hernach chumftich sint, daz wir mit verdahtem muet vnd veraintem willen, ze der zeit, do wir ez wol getuen mohten, ze chouffen haben gegeben vnserm lieben brueder(4), des vorgenanten Herborts sun vnd Dyemueden(5), seiner housfrowen, vnd ir chinden, vnsern hof halben ze dorf, als wir in gehabt haben ze Winchel, vnd den gorten hinder dem hof gar vnd den akher hinder dem hof gar, rehts aigens, vmb ahtzehn pfunt Wienner pfenninge, der wir gentzlich gewert sein, vnd haben ouch di selben pfenning vns vnd vnsern chinden ze bezzerm fruem, ouf di erde an geleit, den vorgenanten hof halben ze dorffe vnd den gorten vnd den akher hinder dem hof gar haben wir in gegeben mit allen dem reht, vnd wir daran gehabt haben, ledichlich vnd vreylich, ze versetzen, ze verchouffen vnd allen ir frumen damit ze schaffen vnd verzeichn vns sein, also, daz wir noch Herbort, vnser sun(6), den wir alain ze den ziten gehabt haben, dchain ansprach darouf nimmermer gehaben suln. Vnd sein ouch des vorgenanten guets ir gewern vnd scherm, als aigens reht ist. Vnd wan vnser sun ze seinen tagen niht chomen ist, setzen wir vns baidiv, vnd vnser guet, fur in ze scherm, als aigens reht ist, vntz vnser sun ze seinen tagen chomen ist, vnd in solich stet tuet, der sie genuegen mak. Daz dise red vnd diser chouf als gelobt vnd beschaiden ist an disem brief von vns stet vnd vnuerchert behalten werde. Daruber gebn wir den vorgenanten Wernhern vnd seiner housfrowen Dyemueten, disen brief ze sicherhait vnd ze vrchundt, beuestent vnd bestetigt mit des edeln herren, hern Hadmars jnsigel von Winchel(7), vnd mit hern Wernhers des Payrs jnsigel von Ruspach(8), di durch vnser bet ir jnsigel daran gehangen habent, wan wir aigens jnsigels niht haben. Deren sache sint gezivge: Chunrat(9), Rotolt(10) vnd Elbein(11), brueder von Pirboum, Vlrich Santplos(12), Hainrich von Portz(13), Wergant von Portz(14), Wernhart von Winchel(15), vnd ander erber leut genueg. Der Brief ist gegebn an sant Vlrichs tak nach Gots geburtte vber drivtzehn hundert iar, darnach in dem dritten iar."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 54 (S 41), S. 72-73