"Ich, Calhoch(1) vnd Fridreich(2) vnde Cunrat( )di Valkenstainer, wier vergehen vnd twen chwent allen den, di disen prief zehent oder horent lesen, daz Vlreich der Nimervol(4) vnd alle zein prueder ain zehent havs da ze dem Nevdorf(5), daz zi zv rechtem lehen von vns gehabt haben: irm vater vnd ir mvoter zem zelgret vnd in zelben, haben versezet vm ainlef pfwnt Passawer pfennig: mit vnser hant vnd mit vnserm gvetem willen dem gotshavs vnd den prueder da ze dem Slag(6), vnd daz avch Cvnzel(7), der vorgenanten prudern ainer, hat avch ain zehent havs da zelbst, da ze dem Nevdorf, daz er von vns gehabt hot: hot avch versezet mit vnser hant vnd mit vnserm gvetem willen, dem vorgnantem gotshavs vnd den pruedern da ze dem Slag: vmb nevn pfwnt Passawer pfennig also besaidicleichen, di weil di zehent nicht geloest werden(a), daz man den nvze an legen zol dem vorgnanten gotshavs vnd den prudern, vnd daz daz steet vnd vnuerchert beleib, [da zue](8) geb wier in disen prief, veringsigelten mit vnsern ingsigiln. Dez zeint gezevg: Dietreich der Kelner(9), Seifrid von Hvmperg(10), Cvnrat von Ludweinsdorf(11), Hainreich der Zenc(12), Calhoch(13) vnd Hainreich(14) von Gotergessing, Vlreich(15) vnd Menhart(16) Clenawer, Jacob(17), der richter von Hasleich(18). Der prief ist geben, do von Cristens pwrt waren dreizehen hvndert iar, in dem dritten jar, an send Lvcn tag."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 56 (S 43), S. 74-75