"Ich, Ortneid der Tanberger(1), wyrgich vnd tun chunt allen den, dy dyesen pryef sehent oder horent lesen, dy nu lebent, vnd her chumftig sint, daz ich mit meiner hausfravn Margretin(2) gutten willen, mit werdothem muot haben gesetzit cwen hof dacz Nidernwevtenpach(3) vm siben vnd czwaincig phunt Passower phening, dem gotzhaus vnd den prudern daz dem Slag(4), der wir in mit rether raitung suldich sein worden, also psaidentleichen, ob daz goczhaus auf diselben hovf stiftung ich geb oder leg, daz si daz auch sullen auf dem zacz haben, vnd losung ceit sol olle iar cir lichmes(5) sein, vnd wan wier noch ter lichmes losen, zo sullen si daz dienst nemmen. Wolt aber daz gotzhaus vnd di prueder daz gut gmain pawen, wan wir den losen, zo sullen si den gtraid wessen. Dar vber geb bir in daz worlaup, ob es in wdeinchen berd, daz si di selben hof seczen, swem zi wellen, mit vnserm guten willen, swo wir sein. Vnd daz auch dem goczhaus disev glub vnd der zacz stet pleiben. Dar vber geb bir dem gotzhaus vnd den prudern daz dem Slag wirinsigilten disen prief, mit meinem insigil, vnd mit meins ohems Chalhochs wan Valchenstain(6). Des sein kceug: Chalhoch der Walchenstainer, Vlreich, der pharrer won sent Oswald(7), Vlreich, der pharrer won Welden(8), Cunrad, der pharrer won Rorpach(9), pruder Dietreich(10) vnd pruder Hainreich(11) wom Slag, Seifrid von Hugenperg(12), Hainreich der Winzperger(13), Cunradus Mulhausin(14), Leb won Rorbach(15). Der prief ist geben, da won Cristz purd woren tausent jar, drev hundert jar, jn dem winftem jar, an sent Britten(16) tag."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 59 (S 46), S. 76-77