"Ich, Wernher der Payr von Ruspach(1), vnd ich, Chunigunt(2), sein housfrowe, wir veriehn vnd tun chunt allen den, di disen brief an sehnt oder heornt lesn, di nu lebnt vnd hernach chumftich sint, daz wir mit gesampter hant vnd mit guetem willen aller vnser chinde, verchouffet vnd ze chouffen gegebn haben vnserm getrivven vriunde Wernhern(3), Herborts(4) sun von Winchel vnd Dyemueden(5), seiner housfrowen, vnd ir baider chinden, vnsern hof ze Winchel(6), mit akher vnd mit wismat vnd swaz darzvo geheort ze dorffe vnd ze velde, ez sei aigen oder purchreht, vmb fumf vnd sibentzik pfunt Wienner pfenning, der wir gentzlich gewert sein, vnd wan vnser tohter Elsbeth(7) vnd vnser sun Gundaker(8), Herbort(9), Wernher(10), Friderich(11) vnd Vlrich(12), di wir nu haben, ze ir tagen noch niht chomen sint, durch scherm vnd bezzer sicherhait, haben wir den vorgenanten Wernhern vnd seiner housfrowen vnd ir baider chinden, den hof ze dem Hag(13), der vnser gechouftes guet ist, mit allen dem, daz dazvo geheort, ze dorffe vnd ze velde, ze rehter ebentivr(14) gesetzet mit des ersamen abt Hainrichs von Chotwig(15) hant, von dem er vnser purchreht ist, fur vnser baider chinde, di noch zv irn tagen niht chomen sint, also, daz er der vorgenanten pfant ze rehter ebentivr sol sein vber den vorgenanten hof ze Winchel, an alle irrunge, als lang vntz vnser tohter vogtber worden sei, vnd vnser sun ze ir tagen chomen sein, vnd sich ouch des hofes ze Winchel gentzlich vertzeichn vnd in solich stet daruber tuen, der sie genuegen mug. Daz dise sache vber dise ebentivr, als vor beschaiden ist, von vns vnd vnsern chinden, stet vnd vnzerbrochn behalten werde, daruber gebn wir Wernhern vnd Dyemuoden vnd ir baider chinden disen brief ze vrchunde, bestetigt mit vnserm anhangenden jnsigel, vnd haben gebeten vnsern herren den vorgenanten abt Hainrichn von Chotwyge, daz er sein jnsigel dar an ze vrchunde gehangen hat. Der brief ist gegebn an der chindlein tag ze wynahten, nach Christes geburt vber drivtzehn hundert iar, darnach in dem fumften jar."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 65 (S 50), S. 83-85