Schuldbrief und Hausverkauf an Schlägl: ||
"Ich, Wernher von Winchel(1), hern Eberharts schriber von Walsse(2), vergich vnd tuen chunt allen den, di disen brief an sehnt oder heornt lesn, daz mir di ersamen herren, brobst Vlrich(3) vnd di samnunge des gotshous ze dem Slag(4) gegebn habent, an meinem hof ze Winchel(5), vnd an meinem zehnt halben ze Winchel, an dem tail des zehnten, der mein lehn ist, von meinem lehen(a), dem vorgenanten hern Eberharten von Walsse hundert pfunt Wienner pfenning alter, also mit beschaidener red ist, daz di vorgenanten herren vmb den zehnten, den willen gewinnen mugen, an den lehn herren, inner jares frist, vnd sich der chouf fuegt, so suln si mir den hof vnd den zehnt geben, vnd herzvo gebn, nach meins herren, hern Eberhartes rat von Walsse, an den wir den chouf gesetzet haben, si suln ouch den nucz hivor haben, an dem tail alain des zehnten, den ich von dem vorgenanten herren han. Wer aber, daz di vorgenanten herren, brobst Vlrich vnd di samnung in der benanten frist den willen vmb den zehnt gentzlich niht gewinnen mugen oder erwerben, so sol ich in di vorgenanten hundert pfunt wider gebn, von sand Georm tag, der nu schirist chumt, darnach vber ein jar, daz si der ze Lintz(6) gewert werden vor dem selben sand Georm tag(7), vnd sol mein hof vnd mein zehnt von in gentzlich ledich sein, vnd allen meinen frum da mit ze schaffen. Daz dise red stet beleib, daruber gib ich den vorgenanten herren ze dem Slag disen brief ze vrchunde, bestetigt mit meins herren, hern Eberhartes jnsigel von Walsse, vor dem vnser wandelung mit beschaidener red geschehn ist, vnd ouch mit meinem jnsigel. Der brief ist geschriben vnd gegebn an dem Antlaz tag(8), nach Christes geburt vber drivtzehn hundert jar, darnach in dem nivnten jar."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 79 (S 63), S. 95-97