Hausverkauf an Eberhard von Wallsee:||
"Ich, Wernher von Winchel(1), schreiber ze den zeiten herrn Eberharts von Walsse(2), vergich vnd tuen chvnt allen den, di disen brief an sehent, lesent oder horent lesen, di nu lebnt, vnd hernach chvenftich sint, daz ich mit verdahtem muet vnd mit guetem willen vnd ze der zeit, do ich ez wol getvn moht, verchauft vnd ze chauffen gegeben han dem edeln, meinem vorgnanten herren hern Eberharten von Walsse, vnd hern Eberharten, seinem svn(2a), datz Winchel(5), meinen hof, der da leit gegn die prukke, vnd den hof akher, der dahinder leit, vnd aigen ist, vnd han in ze chovffen gegeben den hof oberhalb ze nohst mit povngarten vnd mit wismat, daz auch aigen ist, vnd swaz akhers in den selben hof gehort, der purchreht ist, vnd von dem man dient den Tevtschen Herren(12) ze purchreht dreizzich phenning, vnd ein wayd hinder den ækhern, vnd han im darzv ze chauffen gegeben den layen zehnt halben ze Winchel, ze dorffe vnd ze velde, daz vorgnant guet allez vmb drithalb hvndert phvnt, vnd vmb fvemf phvnt Wienner phenning, der ich gentzleich gewert pin, vnd pin auch des vorgnanten guetes alles, ez sei aygen, purchreht oder lehen, des vorgnanten herren, hern Eberharts von Walsse, vnd seins svns hern Eberharts scherm vnd gwer fuer alle ansprach aller erben des aygens, als aygens reht ist, des purchrehts, als purchrehts reht ist, des lehens, als lehens reht ist in dem lande ze Oesterreich. Vnd daz in den oft vorgnanten herren, hern Eberharten von Walsse vnd hern Eberharten seinem svn, dirre [!] chauf vnd dise red stæt vnd vnzebrochen behalten werde, dar veber gib ich in disen prief ze einem vrchvnde, bestætigt vnd versigelt mit meinem jnsigel. Der sach sint gezivg her Rvediger von Rosenowe(13), her Meynhart von Chlingbrvnne(14), Chvnrat Potlvnch(15), vnd Meynhart von Dverrenbach(16), Herbort mein prueder(17), Hainreich mein prueder(18), Chvnrat von Melibrvnne(19), vnd ander erber levt genvg. Der brief ist gegeben an dem Antlaz tag(8), nach Gots geburt vber drivtzehn hvndert iar, darnach in dem nivnden jar."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 81 (S 65), S. 95-97