"Wir, Ruodolff(1) der vierd, von Gotes gnaden erczherczog ze Oesterreich, ze Steyr vnd ze Kernden, herre ze Chrayn, auf der Windischen Marich vnd ze Porttnawe, graf ze Habspurch, ze Phirt vnd ze Kyburch, marichgraf ze Purgow vnd lantgraf in Elsazzen, fuer vns, die hochgeborn fuersten Fridereichen, Albr[echten] vnd Leuppolten, vnser lieb brueder herczogen vnd herren, mit sampt vns der egenanten lande vnd herschefft, der aller als der eltist vnder in, wir vollen vnd ganczen gewalt haben, veriehen vnd tuon chunt offenleich mit disem brief allen den, die in sehent, lesent oder hoerent lesen, daz der erber vnd geistleich probst Jans(2) zuo dem Slegel(3), des ordens von Premonstrat in Pazzower bystuom vnser lieber andechtiger kaplan(4) fuer vns bracht ein hantfest, in latein geschriben, die vnser lieber herre vnd vetter kvenig Friderich(8) selig von Rom, dem goczhaus daselbes zuo dem Slegel geben hat, vnd dar an begriffen ist, wie er mit willen vnd gunst aller seiner bruederr, vnsrer seligen vordern, den Got gnad, solich freyung vnd gnad getan vnd geben hat ewikleich . .(9) dem probst vnd den bruedern gemainlich des klosters zuo dem Slegel, daz si ir schaffer oder poten an irer stat all iar die Tvonaw(10) auf zuo ir notdurfft fueren sullen vnd mugen fuemfczehen fuoder weins freileich vnd ledikleich an mautt vnd an zol vnd an all ander irrung, vnd bat vns, daz wir im, seinen bruedern vnd irn nachkomen in dem egenanten goczhaus dieselb freyung geruochten bestetigen, vnd etwas gnaden darczuo ze tuon derwart, daz si dest pas Got gedienen mugen vnd vmb vnser selbes vnsrer herczoginn(1) vnd aller vnsrer geswistreid geluk vnd hail an sel vnd an leibe dester fleizzichleicher pitten sullen, haben wir in vnd irm goczhaus lautterleich durch Got, durch vnsrer, vnsrer vordern, vnsrer erben vnd nachkomen selen hail willen die obgenant freyung, die in der egenant vnser lieber herre vnd vetter kvonig Friderich(8) von Rom vmb fuemfczehen fuoder weins getan hat, als da vor geschriben stet, bestetigt vnd vernewet, bestetigen vnd vernewen mit disem brief, vnd haben in vnd irm goczhaus von besundern gnaden darczuo gegeben vnd geben ouch wizzentlich mit disem brief ewige freyung noch vmb zehen fuoder weins also, daz der svmme wirt fuemf vnd zwainczig fuoder, die si fuerbas alle iar die Tuonaw auf, freyleich vnd ledikleich an zol, an mautt vnd an all ander irrung ewikleich fuer fueren sullen zuo irr notdurfft. Darvmb gebieten wir ernstlich allen vnsern gegenwuertigen vnd kvenftigen amptleuten, phlegern, richtern, zollnern vnd mauttern, daz si daz vorgenant goczhaus bey denselben freyungen vnd gnaden beleiben lazzen voellikleich vnd si da bey halten vnd schirmen ewikleich. Diser sach sind geczeugen die ersamen vnser lieben andechtigen Albrecht tuomprobst ze Pazzow(11), abt Hainrich von Engel Cell(12), die edeln graf Ott(13) vnd graf Ruodolf(14) von Ortenburch, brueder, graf Volrich(15) vnd graf Hainrich(16) von Schownberg, ouch brueder, vnser lieb oeheim, vnser lieben getrewen Eberhart von Walsse(17) von Lyncz, Eberhart von Chappell(18) Jans von Trawn(19), houptman ob der Ens, Ott von Zelking(22) von Schoenenek, Hainrich von Ratpach24, vnser hofmaister, vnd ander erber leut genuog. Dar veber geben wir disen brief, besigelten mit vnserm grozzem fuerstlichem jnsigel. Der geben ist ze Pazzow, an sand Panthaleons tag, nach Christs gepuerd drevczehen hundert iar, darnach in dem zway vnd sechczigistem iar, vnsers alters in dem drew vnd zwainczigistem, vnd vnsers gewalts in dem fuemften jar." ||
[Eigenhändige Unterschrift:] "+ Wir der vorgenant herzog Ruodolf sterken disen prief mit dirr vnderschrift vnser selbs hant. +"

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 169 (S 128), S. 171-174