"Martinus(1), permissione divina abbas monasterii Montis Sion, alias Strahow(2), intra muros civitatis Pragensis, procurator generalis ordinis Premonstratensis, necnon visitator annuus in plenitudine potestatis, per venerabilem virum, dominum Johannem(3), abbatem Premonstratensem, et generale capitulum, in circaria Boemie, Polonie, Austrie et Moravie specialiter deputatus, arbiter, arbitrator ac amicabilis compositor in et super subscriptis, a fratribus conventus monasterii Plagensis(4), ordinis predicti, Pathaviensis diocesis, parte ex una et religiosum virum, fratrem Henricum(5), canonicum monasterii Milocensis, parte ex altera concorditer electus, discretis ac religiosis viris [...] dominis in Sweras(6) et [...] Caplicz(7) ecclesiarum plebanis, ordinis predicti, salutem et sinceram in Domino caritatem. Dum iuxta officii nostri debitum attenta meditacione pensavimus, quam sint honusta dispendiis, quot eciam et quanta pericula rerum et animarum secum traxit discordia dudum exorta super prepositura monasterii Plagensis predicti, et ob hoc volentes precidere lites, per quas monasterium Plagense predictum diversis exponetur incommodis, cum deliberacione, quam cum iurisperitis et prelatis ordinis habuimus, ad fratrem Henricum predictum, cui de sciencia competenti, vite ac morum honestate, spiritualium providencia et temporalium circumspeccione aliisque virtutum meritis aput nos laudabilia testimonia perhibentur, direximus oculos nostre mentis de persona sua ipsi monasterio Plagensi tam auctoritate ordinaria quam eciam dicta auctoritate arbitraria providimus ipsumque ipsi prepositure prefecimus in prepositum et pastorem, curam et administracionem ipsius Plagensis monasterii sibi in spiritualibus et temporalibus plenarie committendo in eo, qui dat gracias et largitur premia, confidentes, quod idem monasterium per sue circumspeccionis industriam et providenciam circumspectam sub suo felici regimine dextera Domini sibi assistente propicia salubriter et prospere dirigetur et grata suscipiet in eisdem spiritualibus et temporalibus incrementa. Quo circa discrecioni vestre per presentes committimus et sub pena excommunicacionis auctoritate ordinis nobis ||
commissa precipiendo mandamus, quatenus ambo aut unus vestrum corporalem ||
possessionem ipsius prepositure prefato fratri Henrico assignare studeatis protinus, ||
dum per ipsum fueritis requisiti, ipsumque in possessionem iurium, reddituum, censuum, obvencionum, utilitatuum, usufructuum et singulorum emolimentorum ad ipsam preposituram qualitercumque spectancium, non obstantibus renitenciis, opposicionibus et contradiccionibus quibuscumque, inducatis et, quantum in vobis est, inductum defendatis facientes dumtaxat eidem fratri Henrico et nulli alteri per censuales ipsius prepositure de dictis fructibus, iuribus, redditibus, proventibus, censibus, obvencionibus, utilitatibus, usufructibus integre responderi. Datum in monasterio nostro predicto, anno Domini millesimo trecentesimo sexagesimo tercio, sexta decima die mensis iunii."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 171, S. 175-176