"Ich Dyetreich der Astershaimer(1) mein hausfraw(2) vnd all mein erbn veriehen offenleich an dem brief, allen den, di in sehent, hoerent oder lesen, di nu lebent oder hernach chvemftig werden, daz ich mit wol bedachtem muet vnd nach rat meiner vrewnt willen vnd wort den brief, den ich in mein gewalt bracht han von Stroeln dem Juden(3), vmb mein aygenhaft gelt, den selben brief vnd den hof ze Hvmbprenning(4) han ich geantwurt Denchlein dem Hirleinsperger(5) vnd seiner hausvrowen vnd ir baider erbn auz meiner nutz vnd gwer in di sein, alzo, daz ich vnd mein erbn hintz dem hof noch hintz brief furbaz nichtz ze sprechen haben, vnd antwurt im daz mit allen den rechten, alz der Juden brief sait von Vlreichen dem Tolhaimer(6). Daz di red staet vnd vnuerchert beleib, dor veber gib ich den brief, besigelt mit meinem anhangunden jnsigel, vnd zu einer pessern sicherhait vnd gezeugnuezz mit meines lieben ohaims Petrein dez Harrocher(7) jnsigel, vnd mit meines oehaims dez Gangleins von dem Stain(8) jnsigel, di si baid durich meiner willen an den brief gelegt haben, in vnd iren erbn an schaden. Der brief ist gegeben, do man zalt von Christis gepurd drewzehen hvndert jar, vnd dor nach in dem sechs und sibentzkisten jar, dez svntags vor sand Mirteinstag."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 190, S. 191