"Ich, Ffridreich der Trwebenbein(1) ze Wachaw(2), vnd ich Elspet, sein hawsfraw, vnd all vnser erben, wir vergehen offenleich mit dem prief allen den, dew in ansehent, lesent oder hornt lesen, daz wier mit vnserer erben gueten willen vnd gunst, mit wolbedachten muet, vnd nach ratt vnserer nachsten vnd pesten vrewndt, ze der zeit, da wier ez mit recht uol tun machten, verchawft haben vnsers ledigen vnuerchumerten guetz, ain purchrecht weingarten, genant dy Pewnt, gelegen ze Puhel(3) ze nachst Petreins dez Schreiber(4) pewnt, da von man jarchleich dint ze rechtem purchrecht ffvmfczehen Wyenner phenning in dez abptz hoff von Pawern(5) ze Jewching(6) an sand Michels tag, vnd nicht mer. Den obgenanten weingarten mit allen den eren, rechten vnd nutzen, alz wier jn in purchrecht gewer herpracht vnd jnne gehabt haben, also haben wier jn recht vnd redleich verchauft vnd hin geben mit purchern hant, mit dez weschaiden Symons dez Muemeleins(7) aydem, dy zeit hofmaister ze Jewching in dez obgenanten abptz hoff von Pawern, dem erbierdigen geistleichen hern, hern Hainreichen(8), dew zeit probst datz sand Marein Slag, vnd dem conuent daselbs, vmb ffvmfczikch phunt gueter Wyenner phenning, der wier gancz vnd gar weczalt vnd geberet sein ze rechten taegen an allen schaden. Sew schullen vnd muegen auch furbas uol mit dem obgenanten weingarten allen iren frvmen geschaffen mit verchawffen, mit versetzen, schaffen machen vnd geben, wem sew wellen, an all vnserer vnd vnserer erben ierrung vnd widerred. Wier sein auch dez obgenanten weingartens irer rechter scherm vnd gewer fuer all ansprach, alz purchrecht recht ist vnd gebonhait in dem lant ze Oestereich. Waer awer, daz jn mit recht an dem obgenanten weingarten vnd scherm icht abgieng, also, daz sew chrieg oder ansprach gebunen, von wem oder welherlay daz waer, wie sich daz vergieng, daz schullen wier jn alles auzrichten, ablegen vnd wider chern, gantz vnd gar, vnd schullen sew daz haben auf vns vnd auf allem vnserm guet, wa wier daz haben oder lazzen, wesuecht oder vnbesuecht, wa sew dar auf weysen oder zeigen, vnd dez da von wolbechomen mit gerichtes poten vollichleich an alles verrechten, daz ist vnser vnd vnserer erben guetleich will, vnd nichtz dawider tuen, wier sein lemptig oder tod. Dez ze vrchund so geben wier jn den offen prief versygelten, wand ich obgenanter Fridreich noch mein obgenanter purcherr die zeit nicht aygens jnsygel gehabt haben, so haben wier fleizleich gepeten dy erbern Hansen den Chrvmicher(9), dy zeit purchgraff ze Tyrnstain(10) vnd richter in der Wachaw, vnd Chuenrad den Flander(11) ze Wesendoerf, daz sy der sach an unserer stat zewg sind vnd den chauff westaet haben mit iren aygen anhangunden jnsygeln, jn paiden vnd allen iren erben an schaden. Dar vnder ich mich, offtgenanter Ffridreich Truebenbein, vnd ich Elspet sein hawsfraw, vnd all vnser erben verpinten mit vnsern trewen an aydez stat, alles daz staet ze haben vnd ze folfueren, daz oben verschriben stet. Der prif ist geben nach Christi gepuerd drewczehen hundert jar, dar nach in dem syben vnd achtzkisten jar, dez eritags vor sand Larenczen tag(12)."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 206 (S 145), S. 208-209