"Ich, Lienhart von Wasen(1) die czeit purger ze Otenshaim(2) vnd ich Vrsula sein hawsfraw vnd all vnser paider erben, dy wier yeczund haben oder noch hinfuer gewinen, wier veriehen vnd tuen chunt offenleich mit dem brief allen lewten gegenburtigen vnd chunftigen die den brief ansehent hoerent oder lesent, das wier mit wolbedachtem muett gunst vnd willen aller vnser erben vnd pesten frewnt ratt zu der czeit, do wier es mit recht wol getuen mochten, recht vnd redleich chewfleich cze chauffen geben haben dem erbern mann Vlreichen dem Huebmer(3) ze denn czeiten purger ze Euerding(4) seiner hawsfrawn vnd iren paiden erben vnser guet mit aller seiner zugehoerung, genant ze Echkchelsrewt(5), das gelegen ist in Pewrbecher pharr vnd gericht, vnd das vnser freys Stephanysch lehen(6) gewesen ist von dem wirdigen pystum von Pazzaw, mit allen den eren, rechten vnd nuczen vnd darczue gehoert, als wier das selb jnne gehabt haben vnd von alter her choemen ist, versuecht vnd vnuersuecht, nichts ausgenomen, also haben wier jn das ingeantwuert ||
vnd bestaett, aus vnser nutz vnd gewer in ier nutz vnd gewer mit herren hant vnd mit aller staett vnd darczue gehoert, vmb ein gelt des wier von in gancz vnd gar gericht vnd gewert sein worden zu rechten tagen an all vnsern schaden vnd inne. Wier sein auch des obgenanten guets mit aller seiner zugehoerung ier recht gewerner vnd fuerstandt fuer alle ansprach, wo vnd wann in des noett vnd duerft geschicht, als Stephanysch lehensrecht ist in dem lannt ob der Enns. Waer aber, daz in an dem obgenanten guet mit aller seiner zugehoerung vnd an der gewerschaft mit recht icht abgieng, wazz sew des daruber schaden namen, wie der schad genant waer, den ier ains bey seinen trewn vngesworen vnd an alles recht gesprechen mocht, den selben schaden allen mitsampt dem haubguet schullen vnd wellen wier in gancz vnd gar ablegen vnd wider cheren an allen chrieg vnd wider redde vnd schullen sew das alles haben, dacz vns vnd vnsern trewn darczue auf aller vnser hab, dy wier jndert haben auf wasser oder auf lannt, versuecht vnd vnuersuecht, nichts ausgenomen, derselben vnser hab aller, wye dy genant ist, der mugen sew sich darumb wol vnderwinden wo sew darauf choment vnd dew jnne haben, nuczen vnd nyezzen als lang das sew dauon bechoment, paidew haubtguets vnd schadens, dez sew woel genuegt mit vnserm gutleichem willen an chlag, an fuerbot vnd an alles recht vnd was wier von des obgenanten guets vnd chaufs wegen mit jnanhueben, ez waer mit recht oder an recht, geistleich oder weltleich, das habent sew an aller stat gancz vnd gar behabt vnd gewunen vnd wier genczleich gein in verloren, wo wier miteinander darumb fuerchemen. Vnd des zu ainem waren vrchund geben wier jn den offen brief, versigelt vnd wolbestat mit mein obgenants Lienharts von Wasen anhangundem insigel, vnd zu pezzer sicherhait vnd zewgnus willen, so haben wier vleizzig gepeten vnsern lieben vetern Stephan von Wasen(7) vnd Hannsen den Lerichenberger(8), paid purger ze Otenshaim, daz dy auch irew insigel zu zewgnus der sach an den brief gehangen habent, in vnd allen iren erben an schaden. Der brief ist geben, do man czalt von Chrysty gepurd vierczehen hundert jar, darnach in dem sybenden jar, des suntags vor sand Gorigen tag."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 243 (S 158), S. 252-254