"Ich, Bernhart(1), brobst dacz vnser frawn Slag vergich vnd tuen chund allen den, die den brieff sehent, horent oder lesent, das ich mit meinem gutem willen vnd wol wedochten muet, vnd auch meiner fruende rat, czw der czeit, da ich es recht vnd redleichen wol getuen macht, recht vnd redleich chawfleichen czw chawfen geben hab die halb muell, genant Pawngarten Muell(2), gelegen jn Aygener pfarr vnd gericht(3), dew ich vmb mein vatterleich erib gechawft hab, meinem lieben mitpruder, herren Niclosen(4), verchawft vnd geben hab vmb aines vnd funfczik phunt Wienner phening, auch vmb sein vatterleich erb, des mich von ym wol benugt hat. Vnd der selbigen svm gelcz byn ich von ym gancz vnd gar gericht, gebert vnd beczalt warden cze rechter czeit vnd weil, an alles vercziehen vnd an all scheden. Vnd ich antwurt ym auch die obgenant halb muell aus mein nwczen vnd gewer jn sein nwcz vnd gewer, mit allen eren, rechten vnd nwczen vnd gulten, als es von alter her chomen ist, vnd die andern jnne gehabt haben vnd genossen. Vnd ich, obgenanter herr Wernhart, brobst die selbig czeit sein fuerstand byn jn jar czeit vnd frist, als das recht vnd gewendleich ist jn dem Michel land(5) ob der Enns an aller stat, wo ym des nott vnd durft geschiecht, als auch auf der brobstey czw dem Slegel recht ist angevar an all ausczug. Vnd gienng ym aver an dem chawff vnd an der gewerschafft icht ab, es wer mit recht oder an recht, geistleich oder weltleich, jn jar frist des byn ich sein frurstan [!] vnd ich, obgenanter herr Bernhart, brobst, verczeich mich mit dem offen brieff der obgenanten halben muell mit aller czwgehorung, als oben an dem brieff verschriben ist, das ich hinfuer chain anspruch, czuspruch, fodrung noch recht nicht haben schol noch wel, weder mit recht noch an recht, geistleich noch weltleich angevar, ausgenamen den dinst vnd andrew vadrung, dew ein brobst vnd dem goczhaws an gepuert, cze dienen all jar jarleichen. Auch ist ze merchen, wan der obgenante herr Niclos mitpruder ab gieng mit dem tod, da Gott lang vor sey, so schul die vorgenante halb muell auff dem conuent des selbigen wierdigen goczhaws dacz vnser frawn Slag eriben vnd gevallen ewichleichen mit all ir czwgehorung, als oben verschriben ist, ym vnd sein varvaderen zw einer pesseren ewigen gedechtnus. Mit vrchund des briefs, den jch obgenanter herr Bernhart, brobst, gib den offen brieff, versigelt vnd wol bestatten mit meinem anhanngunden jnsigel, vnd mit des erwerigen vnd weisen herrn Niclos Perigher(6) am Perig anhangunden jnsigel, ym vnd sein eriben an schaden, darvmb ich jnn vleizichleich gepeten hab durch aines pesseren bestattnus vnd czewgnus des briefs, das als stat vnd war czw halten trewleichen an gevar. Geben noch Cristi gepurd vierczehen hundert jar, dar nach in dem sechs vnd czwainczisten jar, am eritag vor sand Margarethe virginis tag."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 285 (S 189), S. 306-307