"Leonardus(1) Dei gracia episcopus Patauiensis, vniuersis et singulis has nostras litteras inspecturis salutem in Domino sempiternam. Fidelium deuociones ad animarum suarum salutem conquirendam tunc solicite incitamus, cum sancte matris ecclesie thezaurum, quantum nobis ab altissimo indultum dinoscitur misericorditer dispensamus. Hinc est, quod omnes jndulgencias a reuerendissimis ac reuerendis in Christo patribus et dominis patriarchis atque cardinalibus, archiepiscopis et episcopis monasterio sancte Marie virginis in Plaga(2), capellis eidem annexis, sancti Johannis ewangeliste in Aygen(3) et sancti Vdalrici in Vlreichsperg(4) ecclesiarum parrochialium, ecclesijs et signanter capelle sancti Saluatoris(5) ante predictum monasterium site, nostre diocesis, traditas et concessas auctoritate nostra ordinaria ex certa sciencia recepimus, approbauimus, gratificauimus et confirmauimus, ac harum tenore litterarum recepimus, approbamus, gratificamus et confirmamus. Jnsuper quatenus monasterium ecclesie et capelle in premissis litteris nominatim comprehensis frequenciorj eorundem fidelium deuocione veneretur. Omnibus christifidelibus vere penitentibus, confessis et contritis, qui in festis prelibatis litteris specialiter insertis, memoratas monasterium, ecclesias et capellas deuocionis aut oracionis causa accesserint, ad easque pro luminaribus tempore diuinorum manus porrexerint adiutrices, quotienscumque ea uel aliquot premissorum fecerint, quadraginta dies jndulgenciarum de omnipotentis Dei misericordia et beatorum Petrj et Paulj apostolorum, eius auctoritate ac suffragio confisj, de jniunctis eis penitencijs misericorditer in Domino impartimur, presentibus perpetuis futuris temporibus duraturis. Harum nostrj sub appensione sigillj testimonio litterarum. Datum Patauie, die septima mensis februarij, anno Domini millesimo quadringentesimo quadragesimo nono."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 321 (S 214), S. 348-349