"Wir Fridreich(1), von Gots gnaden Roemischer kaiser, zu allenn tzeiten merer des reichs, zu Hungern, Dalmacien, Croacien etc. kuenig, hertzog zu Oesterreich, zu Steir, zu Kernnden vnd zu Krain etc. Embieten vnserm getrewn Colman Oberhaimer(2), vnserm phleger zu Valkenstain, vnser gnad vnd alles guet. Vns hat der ersam geistlich vnser lieber andêchtiger ~ der brobst zum Slegel(3) anpracht, wie weilent Albrecht(4), bischof zu Passaw, demselben seim gotshaws zum Slegel aus sunder naygung vnd guetikait die pharrkirchen zu Rorbach im Machlannd(5) gelegen ingeleibt, vnd darnach dieselb inleibung durch weilent babst Alexannder(6) vnd babst Pium(7) mit jren bullen bestêtt worden sey. Also, daz dieselb kirchen nu hin fur zu ewigen zeiten bey demselben gotshaws beleiben, vnd ain yeder brobst vnd conuennt daselbs zum Slegel durch die jren verwesen vnd regieren sullen nach lautt jrer brief vnd bull darumb ausganngen, emphelhen wir dir ernstlich vnd wellen, ob jn der so dieselb kirchen yetz jnnehat oder die hin fuer von jrn wegen jnnehaben wirdet, oder yemands annderr mit vebergab vnd in annder weg daran jrrung tuen wolten, vnd du von dem bemelten brobst oder seinn anwalt darumb angelanngt wuerdest, daz du dann von vnsern wegen darob sein vnd soelhs zu beschehen nicht gestatten wellest, vntz an vns daran tuest du vns guet geuallen, vnd vnser ernstliche maynung. Geben zu der Newnstat an mitichen vor sannd Colmans tag, anno Domini etc. lxvto vnsers kaisertumbs im viertzehenten jare."||
Vermerk rechts unten: "Commissio domini jmperatoris per dominum Johannem liber in Newnburg super Enns et in Rorbach confirmauit."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 406 (S 286), S. 443-444