"Ich Elspet Kapplanjnn(1), weylend Lienharten Kapplan saeligen eelichen tochter. Bekenn das fuer mich chomb Wennczl zu Hengstslag(2), vnd gab mir zu erkennen, wye Steffan am Ruederczhoff(3) zu seynn lessten zeytn zway tail zehnt auf aim gut in der Jnndern Oed(4) jn Sarleinspekcher pfarr vnd Veldner landgericht gelegen, mein [und] meiner swesster Anna lehnschafft dem wyerdigen sand Jacobm gotzhaws zu Rorbach geschafft hette, vnd bat mich, jm als lehntrager des benanten gotzhaws den geruhen zu uerleihn. Hab jch angesehn sein vleissig bete, zu voerdrist Got den allmaechtigen, vnd all heyligen, den bemellten zehnt verlihen, vnd leich jm den wissentlich mit dem brief, waz jch jm zu recht daran verleihen sol oder mag. Also, das er als lehntrager denselbm zehnt des beruerten gotzhawss nun fuerbas von mir vnd meinen eribn jn lehns weyss jnnhaben, nuettzen, nyessen vnd nemen sullen. Vnd wann der oder ain annderer lehntrager daselbs mit dem tod abgeet, oder abgesattzt, vnd ain annderer darzu genomen vnd geordnt wierdet, alsofft das beschicht, so sol ain yeder lehntrager daselbs den beruerten zehnt jn der Jnndern Oed von mir, meinen eribn empfahen, vnns vmb diselbm lehnschafft tun, vnd in aller vordrung dauon gehorsam vnd gewaerttig sein, als recht lehns, landes Oesterrich ob der Ens recht ist, angeuaerd. Mit vrkundt des briefs, vnder meinem anhangunden jnsigill, doch mir, meiner vorberuerten swesster, vnd vnnsern eribn an vnnserer lehnschafft, rechten vnd vordrungen vnuergriffenn vnd an schaden. Der geben ist nach Cristj geburd vyerzehn hunndert vnd jm vyer vnd achtczigisten jare, an sambstag vor der heyligen drey kuenig tag."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 494 (S 348), S. 551