Wir Albrecht von gotes gnaden Hertzog ze Osterreich, ze Steyr vnd ze Kernden tun chunt mit disem brief vmb den Hof ze Stemestorf, des zway lehen sint, den Dietel der Mâder vnd Ott der Eysner von Grintzing von vns ze lehen gehabt habent, vnd den die erbern vnd geistlichen Chlostervrowen von sand Claren ze Wienn von in gechouft habent, daz wir die aygenschaft desselben Hofes durch got vnd vnser vnd vnserr vordern sel hail vnd seld willen den vorgenanten geistlichen Chlostervrowen datz sand Claren ze Wienn geben haben vnd geben ouch mit disem brief also, daz dieselben Chlosterurown den vorgenanten Hof furbaz ledichlich vnd vreilich mit alle dem, daz dartzü gehört, in aygens weis innehaben vnd niezzen sullen an alle irrung, als ander aygen gut, datz zu demselben Chloster datz sand Claren ze Wienn gehort. Des geben wir zu vrchund disen brief besigelten mit vnserm Insigel. Geben ze Wienn an Sunntag nach sand Paulstag, als er bechert warde, nach Christes geburt Dreutzehen Hundert Jar darnach in dem zway vnd Viertzkisten Jar.

Source Fulltext: HAUSWIRTH, Schotten (=FRA II/18, 1859) S. 232-233