Ich Gotfrit der Edlinch vnd ich Margret sein hausurowe vnd ich Nichlas der Edlinch sein bru^eder Wir vergehen vnd tvn chvnt allen den, die disen brief lesent oder ho^erent lesen, die nv lebent vnd hernach chv^onftich sint, vmb vnser Lehen, daz da leit ze Staêmestorf, ze velde vnd ze dorffe, daz wir ze Lehen gehabt haben von dem Edeln Hochgeborn fu^ersten Hertzoge Albrechten ze Osterreich, ze Steyr vnd ze Chernden, vnd der die aygenschaft desselben vnsers||
Lehens gegeben hat den erbern gaêstlichen vrowen datz sant Chlarn ze Wienne, daz vns dieselben gaestleichen vrowen datz sand Chlarn daz vorgenant Lehen ze rechtem Purchrecht verlihen habent vnd es auch von in ze rechtem Purchrecht enphangen haben, also daz wir, oder swer dazselbe vnser Lehen nach vns besitzet, fu^erbaz alle iar davon dienen svln Ewichleichen den gaestleichen vrowen datz sant Chlarn vnd allen irn nachchomen Sechtzehen wienner phenninge an sant Go^ergen Tage ze rechtem Purchrecht vnd nicht mer. Vnd daz disev sache fv^erbaz also staet vnd vnzerbrochen beleibe, vnd wand wir selber nicht aigener Insigil haben, darvmb so geben wir In disen brief zv einem warn vrchvnde vnd zv einer ewigen vestnvnge diser sache versigilt mit des erbern Ritter Insigil hern Chvnrats des Nuzdorffer vnd mit vnsers Pru^eder Insigel Albers des Edlings vnd mit Hainreichs Insigil des Pergmaisters von Staemeinstorf, die wir des gepeten haben, daz si irev Insigil zv^e einem gezeuge an disen brief gehangen habent. Diser brief ist geben ze Wienne nach Christes gepurt drevtzehenhundert iar darnach in dem zway vnd viertzgisten iar, des naehsten Maentages vor dem auffert Tage vnsers Herren.

Source Fulltext: HAUSWIRTH, Schotten (=FRA II/18, 1859) S. 234-235