Ich Chu^onrat vnd ich Herman vnd ich Vlreich die bru^eder von Lichtenekk Wir veriehen vnd tu^en chunt allen den, die disen brief lesent oder horent lesen, die nv lebent vnd hernach chunftich sint, daz wir mit aller vnser erben gu^eten willen vnd gunst, mit verdachtem mu^et, zv der zeit, do wir iz wol getu^en mochten, verchauft haben unsers rechten aigens an viertzich phenninge drev phunt Wienner phenninge geltes, die da ligent ze Peystorf, drithalb phunt vnd zwaintzich phenninge geltes auf gestiftem gu^et behauster holden, die man alle iar dient halb an sant Go^erigentage halb an sand Michelstag, vnd Sechzich phenning geltes auf einer wise, der zwai Tagwerich wismades sind, daselbens ze Peystorf datz Ro^er. Die vorgenanten Gulte haben wir Recht vnd redleichen verchauft vnd geben mit allem dem nutz vnd rechten, als wir si in aigens gewer herpracht haben vnd alz si von alter herchomen ist, vmb Syben vnd dreizich phunt Wienner phenninge, der wir gar vnd gaenzleich verricht vnd gewert sein, dem hochwirdigen herren Apt Nyclasen dez Gotshauses vnser Vrowen datz den Schotten ze Wienne vnd dem Conuent gemaine dezselben Gotshauses vnd allen im nachchomen, furbaz ledichleichen vnd vreileichen ze haben vnd allen irn frumen damit ze schaffen, verchauffen, versetzen vnd geben, swem si wellen, an allen irrsal. Vnd darvber durch pesser Sicherhait so setzen wir vns, ich Chu^onrat vnd ich Herman vnd ich V^olreich die bru^eder von Lichtenekke vnuerschaidenlich mitsampt allen vnsern erben vber die vorgeschriben Gulte datz Peystorf dem egenanten Apt Nyclasen des Gotshauses vnser Vrowen datz den Schotten ze Wienne vnd dem Conuent gemain dezselben Gotshauses vnd allen irn nachchomen zv rechten gewern vnd scherm fur alle ansprach, alz aigens recht ist vnd dez Landes recht ze O^esterreich. Waer aber, daz si mit recht an der oftgenanten Gulte ze Peystorf icht Chrieges oder ansprach gewunnen, von swem daz waer, daz suln wir in an allen irn schaden alles auzrichten, vnd suln auch si daz haben auf vns vnd auf allem vnserm gu^et, daz wir haben in dem Lande ze O^esterreich, wir sein lebentich oder tode. Vnd daz diser Chauffe furbaz also staet vnd vntzerbrochen beleibe, darumb so geben wir in disen brief zv einem warn sichten vrchunde vnd zv einem gezevge vnd zv einer ewigen vestenunge diser sach versigilten mit vnsern Insigiln. Diser brief ist geben ze Wienne nach Christes gepu^orde Drevzehen Hundert iar darnach in dem Drev vnd Viertzgisten iar, an sand Cholmans Abent.

Source Fulltext: HAUSWIRTH, Schotten (=FRA II/18, 1859) S. 244-245