Vrbanus episcopus seruus seruorum dei venerabilibus fratribus . . Olomucensi et . . Frisingensi episcopis ac dilecto filio . . decano ecclesie omnium sanctorum Wiennensis, Patauiensis diocesis, salutem et apostolicam benedictionem. Peticio dilecti filii Henrici de Altwys, rectoris parrochialis ecclesie in Haugstorf, Patauiensis diocesis, nobis exhibita continebat, quod, licet olim ipse dictam ecclesiam tunc per obitum quondam Eberhardi, ultimi ipsius ecclesie rectoris, uacantem auctoritate quarumdam literarum apostolicarum graciose sibi concessarum, prout ex ipsarum forma poterat, infra tempus legitimum acceptasset et de illa sibi prouisum fuisset canonice, tamen Syfridus, natus quondam Nicolai de Ritendorf, qui se gerit pro presbytero dicte diocesis, falso asserens, dictam ecclesiam ad se spectare, ac gracie, acceptacioni et prouisioni huiusmodi contra iusticiam se opponens, impediuit, prout itnpedit, ac fecit et facit, quominus gracia, acceptacio et prouisio predicte debitum sortite fuerint et sorciantur effectum, ipsamque ecclesiam occupauit et detinuit, prout detinet indebite occupatam, fructus percipiens ex eadem et alias eundem Henricum super dicta ecclesia multipliciter molestauit, propter que dictus Henricus ad sedem apostolicam appellauit, nosque causam appellacionis huiusmodi et negocii principalis quondam Johanni Mombray, cappellano nostro et auditori causarum palacii apostolici, ad instanciam dicti Henrici audiendam comisimus et fine debito terminandam, qui ad instanciam magistri Johannis Gascow, substituti per magistrum Andream Australis procuratorem dicti Henrici, prout ad hoc idem Andreas ab eodem Henrico sufficiens mandatum habebat et eidem auditori apud acta cause huiusmodi legitime constabat, coram eo in iudicio comparentis, contra prefatum Syfridum ad nonnullos citacionis actus in audiencia publica, ut est moris, processit. Et deinde per dictum Johannem substitutum ad probandum causam huiusmodi fore ad Romanam curiam legitime deuolutam, nonnulis instrumentis publicis coram eodem auditore in iudicio productis, prefatus auditor, quia per producta huiusmodi sibi legitime constitit, causam huiusmodi fore ad eandem curiam legitime deuolutam et apud eam tractari et finiri debere, ad dicti Johannis substituti instanciam predictum Syfridum ad dandum et recipiendum libellum et ad prestandum et per alteram partem prestari uidendum iuramentum de calumnia et de ueritate dicenda in causa huiusmodi in dicta audiencia successiue citari fecit ad certos terminos peremptorios competentes, in quibus idem Johannes substitutus coram prefato auditore in iudicio comparens predicti Syfridi non comparentis contumaciam accusauit et in eius contumaciam quendam pro parte sua dedit libellum et predictum in ipsius auditoris presencia prestitit iuramentum in dictis terminis ad hec datis. Postmodum uero dicto Johanne substituto et magistro Doyno de Remis substituto per magistrum Wolterum de Argentina procuratore dicti Syfridi, prout ad hoc idem Wolterus ab eodem Syfrido sufficiens mandatum habebat et eidem auditori apud acta cause huiusmodi legitime constabat, coram prefato auditore in iudicio comparentibus, ac traditis per eos nonnullis posicionibus et articulis in causa huiusmodi, et contra eosdem posiciones et articulos quibusdam excepcionibus hinc inde datis pro ductisque per eos nonnullis litteris apostolicis et instrumentis publicis aliisque iuribus et munimentis, quibus partes ipse uoluerunt in huiusmodi causa uti et contra eadem producta quibusdam excepcionibus utrinque datis in terminis, eis ad hoc per dictum auditorem successiue et peremptorie assignatis, tandem dictis Doyno et Johanne substituto coram eodem auditore in iudicio comparentibus ac Johanne substituto in huiusmodi causa concludi petente, Doyno uero predictis in ipsa causa concludere recusante nec aliquam causam racionabilem allegante, quare in ea concludi non deberet, memoratus auditor, reputans eundem Doynum quoad hoc, prout erat merito, contumacem, in eius contumaciam cum dicto Johanne substituto in huiusmodi causa concludente conclusit et habuit pro concluso, ac eisdem substitutis coram eo in iudicio constitutis ad suam in huiusmodi causa diffinitiuam sentenciam audiendam assignauit certam diem peremptoriam competentem, in qua dicto Johanne substituto coram prefato auditore in iudicio comparente et dicti Doyni non comparentis contumaciam accusante et in eius contumaciam huiusmodi sentenciam ferri petente sepedictus auditor, reputans eundem Doynum quoad actum huiusmodi, prout erat merito, contumacem, in eius||
contumaciam, uisis et diligenter inspectis omnibus et singulis actis accitatis, habitis et productis in causa huiusmodi ipsisque cum diligencia recensitis et examinatis ac facta super hiis omnibus coauditoribus suis dicti palacii relacione plenarie et fideli de ipsorum coauditorum consilio et consensu, per suam diffinitiuam sentenciam pronunciauit, decreuit et declarauit, prout hec omnia in dicto libello petita fuerant, graciam, acceptacionem et prouisionem predictas et omnia inde secuta secuta fuisse et esse canonica ac suum debitum debuisse et debere sortiri effectum, dictamque ecclesiam ad predictum Henricum pertinuisse et spectasse, ac spectare et pertinere de iure, sibique eandem ecclesiam cum omnibus iuribus et pertinenciis suis adiudicandum fore et adiudicauit, predictoque Syfrido in prefata ecclesia seu ad eam nullum ius compeciisse aut competere, ac ipsum Syfridum a possessione ecclesie ac iurium et pertinenciarum predictorum amouendum fore, et quantum potuit, amouit, et prefatum Henricum in possessionem pacificam seu quasi eiusdem ecclesie iuriumque reddituum et prouentuum ipsius inducendum fore, et quantum potuit, induxit, ac opposiciones et impedimenta predicta fuisse et esse temeraria, illicita et iniusta et de facto presumpta, et predicto Syfrido super molestacionibus et impedimentis ac ecclesia predictis perpetuum silencium imponendum fore et imposuit, ac eundem Syfridum in fructibus ex dicta ecclesia a tempore mote litis perceptis et in huiusmodi causa coram eo legitime factis condemnandum fore et condemnauit, ipsarum expensarum taxacione sibi imposterum reseruata, a qua quidem sentencia pro parte dicti Syfridi fuit ad sedem appellatum predictam. Nosque causam appellacionis huiusmodi ab eadem sentencia interiecte dilecto filio magistro Jacobo Floriani, capellano nostro et auditori causarum palacii predicti, audiendam commisimus et fine debito terminandam, qui ad instanciam dicti Johannis substituti, coram eo in iudicio comparentis et asserentis, huiusmodi appellacionem pro parte dicti Syfridi a prefata sentencia interiectam fuisse et esse desertam, predictum Doynum ad docendum de diligencia prosecucionis appellacionis huiusmodi per quendam cursorem nostrum citari fecit ad certum peremptorium terminum competentem, in quo dictus Johannes substitutus coram prefato Jacobo auditore in iudicio comparens predicti Doyni non comparentis contumaciam accusauit, idemque Jacobus auditor ad dicti Johannis substituti instanciam prefatum Doynum ad suam in causa huiusmodi sentenciam audiendam per quendam cursorem nostrum citari fecit ad certam diem peremptoriam competentem, in qua dicto Johanne substituto coram eodem Jacobo auditore in iudicio comparente et dicti Doyni non comparentis contumaciam accusante et in eius contumaciam huiusmodi appellacionem ab eadem sentencia, ut prefertur, interiectam fuisse et esse desertam pronunciari et sentenciam huiusmodi ferri petente prefatus Jacobus auditor, reputans dictum Doynum quoad actum huiusmodi, prout erat merito, contumacem, in eius contumaciam uisis et diligenter inspectis omuibus et singulis actis et habitis in causa huiusmodi de consilio et assensu coauditorum suorum dicti palacii, quibus super hiis relacionem fecit fidelem, per suam sentenciam pronunciauit, decreuit et declarauit, prefatam appellacionem a predicta diffinitiua sentencia interpositam fuisse et esse desertam, ipsumque Syfridum in expensis coram eo in huismodi causa legitime factis condemnandum fore et condemnauit, ipsarum expensarum taxacione sibi imposterum reseruata. Et subsequenter dictus Jacobus auditor, cui nos commisimus, ut etiam expensas coram dicto Johanne auditore in huiusmodi causa factas taxaret ac instrumentum publicum super dicta sentencia prefati Johannis auditoris confectum sigillaret, cum idem Johannes auditor, antequam expensas taxasset et instrumentum huiusmodi sigillasset, vita functus extitisset, ad dicti Johannis substituti instanciam prefatum Doynum ad uidendum taxari omnes expensas huiusmodi per quendam cursorem nostrum citari fecit ad certum terminum peremptorium competentem, in quo dicto Johanne substituto coram prefato Jacobo auditore in iudicio comparente et dicti Doyni non comparentis contumaciam accusante et in eius contumaciam huiusmodi expensas taxari petente predictus Jacobus auditor, reputans eundem Doynum quoad actum huiusmodi, prout erat merito, contumacem, in eius contumaciam coram dicto Johanne auditore in quinquaginta duobus et coram se factas expensas huiusmodi in decem florenis auri de camera boni et iusti ponderis prouida meditacione taxauit, predicti Johannis substituti super eisdem expensis iuramento secuto, prout in predicto super Johannis et aliis publicis instrumentis super Jacobi auditorum prefatorum sentenciis prefatis inde confectis, dicti Jacobi auditoris sigillo munitis, dicitur plenius contineri. Nos igitur predicti Henrici supplicacionibus inclinati, que super hiis ab eisdem auditoribus prouide facta sunt, rata habentes et grata dictamque sentenciam ipsius Johannis auditoris auctoritate apostolica confirmantes discrecioni uestre per apostolica scripta mandamus, quatinus uos uel duo aut vnus uestrum per uos vel alium seu alios premissa execucioni debite demandantes dictamque sentenciam eiusdem Jacobi auditoris, ubi et quando expedire uideritis, auctoritate nostra solenniter publicantes, eundem Henricum uel procuratorem suum eius nomine in corporalem possessionem ecclesie iuriumque et pertinenciarum predictorum, amoto exinde dicto Syfrido, inducatis auctoritate nostra et defendatis inductum, facientes sibi de ipsius ecclesie fructibus, redditibus, prouentibus, iuribus et obuencionibus uniuersis integre responderi et de predictis perceptis fructibus et florenorum summis pro dictis expensis iuxta predictorum instrumentorum eorundem condemnacionum et taxacionis tenores plenam et debitam satisfactionem impendi, contradictores per censuram ecclesiasticam appellacione postposita compescendo. Datum Janue V. kalendas Julii, pontificatus nostri anno nono.||
Registrata gratis. Gotfridus.

Source Fulltext: HAUSWIRTH, Schotten (=FRA II/18, 1859) S. 407-411