Wir Albrecht von gots gnaden Hertzog ze Österreich, ze Steyr, ze Kernden vnd ze Krain, Graue ze Tyrol etc. Bechennen, als die erbern geistleichen vnser lieben andechtigen, Abt Hainreich vnd gemainleich der Conuent des Gotzhauss vnser frawn datz den Schotten hie ze Wienn, zway phunt gelts wienner phenning, sechtzig Metzen waytz, Kruter mass, vnd sechs vnd virtzig Kes gelts, gelegen ze Hemad bei Krut auf funf Lehen vnd auf ainer hofstat, das alles desselben Gotzhauss rechts aygen gewesen ist, willikleichen vnd durch irs frumen willen verwechselt haben mit vnserm lieben getrewn Hannsen von Liechtenstain von Nicolspurg, vnserm Hofmaister, vmb drew phunt vnd drey schilling gelts vnd vmb zwen mutt Korn vnd zwen mutt habern gelts gelegen ze Parnewsidel auf dem Marchueld, ze Leubmanstorff vnd ze Aschpach auf behausten gütern, das auch alles vnsers obgenanten Hofmeisters rechts aygens gewesen ist, nach lautt der brief, die si daruber gen einander geben habent, Daz wir als furst vnd herre des Landes zu demselben wechsel vnsern gunst vnd willen gegeben haben vnd bestetten den auch wissentleich mit demgegenwurtigen vnserm brief mit aller der zir vnd ordnung, als sitleich vnd gwönleich ist vnd dartzu gehöret an geuer. Dauon so maynen wir, daz der vorgeschriben wechsel von baiden tailn vnd von allermenikleich stet vnd vntzebrochen beleib in aller der form vnd weis, als der beschehen ist vnd die brief lauttent, die von den vorgenanten baiden tailn daruber geben sind. Wir wellen auch yettweders tails vber die güter vnd gülte des vorgeschriben wechsels rechter scherm sein vor allem gwalt vnd vnrecht, als wechsels vnd Landes recht ist an alles geuer. Mit vrchund ditz briefs, geben ze Wienn an Eritag nach sand Margretentag, nach Christi gepurde Drewtzehenhundert Jar darnach in dem vier vnd newntzigistem Jare.

Source Fulltext: HAUSWIRTH, Schotten (=FRA II/18, 1859) S. 439-440