Celestinus episcopus. seruus seruorum dei. Dilectis filiis Cunrado abbati et fratribus monasterij de Sitansteten. Salutem et apostolicam benedictionem. Justis petentium desideriis dignum est nos facilem prebere consensum et uota que a rationis tramite non discordant. effectu prosequente complere. Eapropter dilecti in domino filij. uestris iustis postulationibus grato concurrentes assensu. personas et monasterium uestrum cum omnibus. que impresentiarum rationabiliter possidetis. aut in futurum iustis modis prestante domino poteritis adipisci. sub beati Petri et nostra protectione suscipimus. Specialiter autem Monasterium ipsum de Sitansteten cum omnibus pertinentiis et possessionibus suis auctoritate uobis apostolica confirmamus. et presentis scripti patricinio communimus. sub intimatione anathematis districtius inhibentes. ne tu uel aliquis ex tuis successoribus. fili Abbas. predia uel alias possessiones ipsius Monasterij. absque nostra uel nostrorum successorum licentia speciali alienare presumat. Nulli ergo omnino hominum liceat hanc nostre paginam protectionis. confirmationis et inhibitionis||
infringere. uel ausu ei temerario contraire. Si quis autem hoc attemptare presumpserit. indignationem omnipotentis dei et beatorum Petri et Pauli. apostolorum eius se nouerit incursurum. Datum Laterani III. kal. Maij. Pontificatus nostri anno Quinto.

Source Fulltext: RAAB, Seitenstetten (=FRA II/33, Wien 1870) S. 26-27