Fridericus dei gratia Dux Austrie et Stirie. ac dominus Carniole. omnibus has litteras inspecturis in perpetuum. Ea. que sub tempore geruntur. ne simul cum tempore labantur. scripture debent testimonio perhennari. Hinc est. quod notum fieri uolumus tam presentibus quam futuris. presertim sub nostro dominio constitutis. nos recepisse domini nostri Patauien. Episcopi litteras in hunc modum. Domino et amico karissimo. Friderico illustri Duci Austrie et Stirie. et domino Carniole. R. dei gratia Patauien. Episcopus sincere dilectionis obsequium. Dilectus in Christo frater abbas in Sytansteten in nostra presentia constitutus ordine iudiciario proposuit et probauit per testes ydoneos coram nobis. quod per suos antecessores coram nostris antecessoribus sententialiter est probatum. sepius et optentum. possessiones quasdam in prochnich. immediate ad suam ecclesiam pertinere. nec eas Ulricus de Prunsperch, habere pheodali iure. qui eas sibi pheodaliter de facto, non de iure nomine patauiensis ecclesie uendicauit. Vnde prefate possessiones dicte ecclesie in Sytansteten sunt finaliter adiudicate et assignate possessioni dicti abbatis et sue ecclesie corporali. Postmodum vero predictus ulricus spreta iusticia dictas possessiones iterum non ut decuit uel debuit. sed ut uoluit et ualuit occupauit in sue anime periculum et prefati abbatis preiudicium et grauamen. Et cum idem abbas de re iudicata. ut legitime probauit conquereretur. sibi inferri iniuriam iterato ab vlrico aduersario suo sepe dicto. coram nobis presente nec sibi ad predicta rationabiliter respondente. item quod per eundem vlricum sua sit turbata possessio violenter. suplicauit nobis humiliter. ut super his sibi paterne prouidere et consulere dignaremur. Nos itaque pro ipso et cum ipso instanter postulamus. quatenus eidem abbati et sue ecclesie propter deum principaliter iurisque causa, et nostre dilectionis et obsequii respectu. uelitis protectione uestra ratione aduocatie taliter prouidere. ne de cetero in ipsis possessionibus iusto iudicio sepius optentis. lesionem seu iniuriam paciatur. Verum cum pium nostrum assensum digne prebere iustis ac honestis peticionibus predicti domini et amici nostri episcopi debeamus. tum propter peticionem et auctoritatem ipsius. vtpote qui iudex causa extitit in eadem. tum propter iusticiam rei. prout in litteris suis nostris insertis conprehendi poterit manifeste sepius iudicate. que pro ueritate merito est habenda. cum iuxta legitimas sanctiones tanta sit iudicialis auctoritas. ut pro ipsa sit semper merito presumendum. tum eciam propter ius aduocatie. quo monasterij S. Marie in Sytansteten cum suis pertinentiis iura integra ac illibata tenemur fauorabiliter deffensare. possessiones superius in litteris domini episcopi declaratas. per abbatem in Sytansteten Ditricum et suum conuentum. nec non antecessores ipsius optentas. iudicio contradicto. quas Vlricus de prunsperch de facto occupauerat. non de iure. sub nostram pro tectionem pecialiteramplectentes. cum non sufficiat mittere in possessionem. nisi prius missus in ea tueatur. iam dicto Vlrico firmiter precipimus sub obtentu gracie nostre. nec non rerum et persone. ne monasterium memoratum in hiis et in aliis suis possessionibus de cetero aggrauet uel molestet, alioquin ipsum nostra puniet taliter celsitudo. quod ceteri exemplo suo perterriti. similia facere pertimescunt. nam quem dei timor a malo non reuocat. saltim cohercere debet secularis seueritas discipline. Ut autem sentencia super possessionibus memoratis iuste lata. robur et uires perpetue optineat firmitatis. presens scriptum nostri sigilli munimine confirmamus. ad maiorem negotij cautionem testibus. qui et sententie late aderant et confirmationi nostre non indebite subnotatis. Qui sunt Venerabilis electus Secouiensis Vlricus. Liupoldus prepositus ardacensis Magister Liupoldus plebanus wiennensis. prothonotarius noster. Marquardus Notarius noster. Vlricus de Chirchlinge. Otto de Walchunschirchen. Ditricus de Tobra. Sivridus de Tobra. Marquardus de Chirchsteten. Heinricus de Wasen. Vlricus de Richenstein. Chunradus de piberbach. Chunradus de Timinge. Woluelinus et Chunradus fratres de Gleuze. et alii quam plures. Acta sunt hec Starchenberg Anno dominice incarnationis Millesimo. Ducentesimo. Quadragesimo Quarto. Decimo kalend. Julij. Secunde Indictionis.

Source Fulltext: RAAB, Seitenstetten (=FRA II/33, Wien 1870) S. 47-49