Urbanus episcopus. seruus seruorum dei. Dilectis filijs . . . Abbati Monasterij de Cremismunster et ... Preposito ecclesie sancti Floriani. Patauien diocesis. Salutem et apostolicam benedictionem. Sua nobis . . . Abbas et Conuentus Monasterij s. Marie de Sitansteten petitione monstrarunt. quod Fredericus Abbas Monasterij de Cleuniaco. Patauien. diocesis in Heberhardum et Henricum presbyteros predicte diocesis pro eo. quod idem Heberardus de Waidhouen ac dictus H. de Hollestain ecclesias. cum iuribus et pertinentiis suis ad eosdem Abbatem et Conuentum de Sitansteten spectantes per uiolentiam occuparant. et ab eodem Abbate de Cleuniaco moniti diligenter. ecclesias ipsas eis restituere contumaciter denegarunt. cum hoc esset ita notorium. quod nulla poterat tergiuersatione celari. auctoritate venerabilis fratris nostri Ottonis. episcopi Patauien. loci diocesani. excomminicationis sententiam exigente iustitia promulgauit. Otto quoque decanus christianitatis lauriacen. prefate diocesis presbyterorum ipsorum crescente contumacia. easdem ecclesias auctoritate predicti episcopi suadente iustitia ecclesiastico supposuit interdicto. Verum memorati presbyteri huiusmodi excommunicationis sententiam dampnabiliter contempnentes. in eisdem ecclesijs interdictis diuina officia celebrare. immo uerius. quantum in eis est. prophanare. ac Vlricus miles. Conradus. Henricus et alij parrochiani predictarum ecclesiarum in eis sic interdictis ab eisdem presbyteris diuina huiusmodi audire. presumunt. in animarum suarum periculum. plurimorum scandalum. et dictorum Abbatis et Conuentus preiudicium et ecclesiastice discipline contemptum. propter quod abbas de Cleuniaco et decanus predicti in militem. Conradum. Henricum. et alios parrochianos predictos. quia per eos moniti diligenter a presumptione huiusmodi desistere contumaciter denegarunt. cum hoc ita esset notorium. quod nulla poterat tergiuersatione celari. auctoritate prefati episcopi excommunicationis sententiam exigente iustitia promulgarunt. Quare dicti Abbas et Conuentus Monasterij s. Marie humiliter petebant a nobis. ut easdem sententias robur firmitatis debitum obtinere. dictosque presbyteros de presumptione huiusmodi pena puniri canonica faceremus. Quocirca discretioni uestre per apostolica scripta mandamus. quatinus sententias ipsas. sicut rationabiliter sunt prolate. faciatis auctoritate nostra usque ad satisfactionem condignam appellatione remota inuiolabiliter obseruari. Super eo uero. quod predicti presbyteri diuina taliter prophanare dicuntur. quod canonicum fuerit appellatione postposita decematis. facientes. Quod decreueritis. per censuram ecclesiasticam firmiter obseruari. Datum apud Urbemueterem II. Non. Junij. Pontificatus nostri Anno Tertio.

Source Fulltext: RAAB, Seitenstetten (=FRA II/33, Wien 1870) S. 70-71