Clemens episcopus. seruus seruorum dei. Dilectis filijs . . . Preposito et Erboni et Kalhoho. Canonicis ecclesie Ratisponen. Salutem et apostolicam benedictionem. Sua nobis dilecti filij . . . Abbas et Conuentus Monasterij s. Marie in Sitensteten. ordinis s. Benedicti. Patauien. diocesis petitione monstrarunt. quod Fredericus tunc Abbas Monasterij de Gleunic. eiusdem ordinis. prefate diocesis. in Heberardum et Henricum. presbyteros ipsius diocesis pro eo. quod idem Heberardus de Weidhouen ac dictus Henricus de Holestein ecclesias cum iuribus et pertinentijs suis ad eosdem Abbatem et Conuentum de Sitesteten spectantes. per uiolentiam occuparant. et ab eodem Abbate de Gleunic moniti diligenter. ecclesias ipsas eis restituere contumaciter denegarant. cum hoc ita esset notorium. quod nulla poterat tergiversatione celari. auctoritate uenerabilis fratris nostri . . . Patauien. Episcopi. loci diocesani. excommunicationis sententiam exigente iustitia promulgauit. Otto quoque Decanus Christianitatis Lauriac. prefate diocesis. presbyterorum ipsorum crescente contumacia. easdem ecclesias auctoritate predicti Episcopi suadente iusticia ecclesiastico supposuit interdicto. Verum memorati presbyteri huiusmodi sententiam dampnabiliter contempnentes. in eisdem ecclesijs interdictis diuina officia celebrare. imo uerum quantum in eis est. prophanare presumunt. in animarum suarum periculum. plurimorum scandalum. ac eorumdem Abbatis et Conuentus de Sitensteten preiudicium et grauamen. Propter quod felicis recordationis Urbanus papa predecessor noster . . . Abbati Monasterij de Cremsmunster et ... Preposito ecclesie S. Floriani prefate diocesis. suis dedit litteris in mandatis. ut senteutiam ipsam. sicut rationabiliter prolata erat. facerent usque ad satisfactionem condignam appellatione remota inuiolabiliter obseruari. Super eo uero. quod ijdem presbyteri sic ligati. In eisdem ecclesijs presumebant diuina officia celebrare. quod canonicum foret. statuere procurarent. facientes quod decreuerint. per censuram ecclesiasticam firmiter obseruari. invocato ad hoc. si opus esset, auxilio brachij secularis. Sane Abbas de Cremsmunster et prepositus predicti. quibus legitime constitit. quod predicta sententia rationabiliter lata erat. predictos presbyteros excommunicatos publice nuntiarunt. sed ipsi maledictionem bibentes ut aquam. ac sententiam ipsam per duos annos et amplius dampnabiliter tolerantes animo indurato. redire ad mandatum ecclesie paruipendunt. Quare prefati Abbas et Conuentus humiliter petebant a nobis. ut prouidere super hoc manum contra eos aggrauari mandando. paterna sollicitudine curaremus. Quocirca discretioni uestre per apostolica scripta mandamus. quatinus si est ita. dictos presbyteros usque ad satisfactionem condignam singulis diebus dominicis et festiuis. pulsatis companis et candelis accensis excommunicatos publice nuntietis. et ab alijs per omnia loca. in quibus expedire uideritis. nuntiari faciatis. et ab omnibus arctius euitari. Quod si non omnes hijs exequendis potueritis interesse. duo uestrum ea nichilominus exequantur. Datum Perusij X. kal. Aprilis. Pontificatus nostri Anno Primo.

Source Fulltext: RAAB, Seitenstetten (=FRA II/33, Wien 1870) S. 74-76