Nos Fridericus. permissione diuina Prepositus Frisingensis. et Magister Chunradus. Canonicus Sancti Andree. Presentibus profitemur et scire uolumus uniuersos. quod cum reuerendi uiri. uenerabilis Abbas Gerstensis et Magister Wernhardus. Decanus Patauiensis. et nos una cum ipsis essemus electi arbitri. siue amicabiles compositores ad sopiendam litem. eam dudum ortam inter reuerendum in Christo Patrem Dominum Chunradum Frisingensem Episcopum et eius ecclesiam ex una parte nec non uenerabiles uiros Abbatem et Conuentum monasterii in Sitansteten ex altera. super iure patronatus de Waidhofen. de Aspach et de Hollenstein ecclesiarum. nec non attinentiis earundem. prefata questio accedente consensu auctoritate reuerendi in Christo Domini Petri Patauiensis episcopi. et de communi consilio dictorum Abbatis et Decani. nec non et nostro. Salzburge taliter est decisa. uidelicet quod dicti Abbas et Conuentus de Sitansteten perpetuo tenebunt ecclesiam in Aspach cum omni iure presentandi. quemadmodum tenuerunt eam ante litem motam. nullo iure presentandi Frisingen. episcopo uel eius successoribus in ipsa ecclesia remanente. Decimas insuper ecclesiarum in Waidhofen et in Hollenstein colligent et recipient in usus suos et Monasterii sui perpetuo. quemadmodum receperunt ab antiquo. Ecclesia in Oponiz ad parochiam in Holenstein tanquam ad matricem ecclesiam perpetuo redeunte prebenda insuper sacerdotum. siue nunc institutorum. siue inposterum per reuerendum Frisingensen episcopum aut eius successores ad ipsas ecclesias Waidhofen et Holenstein presentandorum. Sicut erat ante litem motam. in nullo per Abbatem et eius succesores decisa uel deminuta. hoc adiecto. quod prebenda in Holenstein que fuit ante litem motam. debeat per Abbatem et Conuentum cum decimis ipsius ecclesie in redditibus ad ualorem unius libre monete Wiennensis augmentari. et si reuerendo Patri Patauiensi episcopo uidebitur propter iura episcopalia et necessitatem secundi sacerdotis ipsam prebendam de decimis prelibate parochie moderabitur largiorem. prebendam autem ecclesie in Waidhofen antiquam prefati Abbas et Conuentus ad ualorem dimidie libre cum decimis meliorabunt. iure presentandi et eligendi personas ad prefatas duas ecclesias Waidhofen et Holenstein perpetuo apud Frisingensem episcopum eiusque successores remanente. nullo iure dictis Abbati aut Conuentui in predictis duabus ecclesiis uel earum sacerdotibus aliter. quam predictum est. reseruato. Ad hec predicti Abbas et Conuentus eorumque successores eorum prouisione reuerendi Patris Patauiensis episcopi et ex forma arbitrii promulgati soluent annis singulis in omnem euentum. Magistro Heinrico Canonico Frisingensi. plebano de Waidhofen III. libras monete Wienensis pro tempore uite sue et Magistro Hermanno Canonico S. Andree Plebano de Holenstein pro tempore uite ipsius III libras eiusdem monete ratione decimarum ecclesiarum earundem. certa pena in defectum ipsius solutionis deputata. In cuius rei perpetuam memoriam et euidentiam presentes nostri sigilli munimine duximus roborandas.

Source Fulltext: RAAB, Seitenstetten (=FRA II/33, Wien 1870) S. 84-86