Nos Fridericus. dei gratia Gerstensis Ecclesie Abbas. Iudex delegatus a venerabili patre ac domino nostro Petro Patauien. episcopo in causa, que uertitur inter venerabilem abbatem de Sytansteten et fratres suos ex una parte, ac dominum Johannem,||
Rectorem Ecclesie de Sunlburch ex altera. presentibus litteris protestamur. quod cum partes in die peremtorio apud Ecclesiam sancti Egidij Styrie coram nobis constitute fuissent, procuratores dictj abbatis contra dom. Johannem prefatum possessorium intentabant, dicentes. se ligitime probaturos. quod idem Jo. Monasterium Sytanstet. sine jure a possessione uel quasi minorum decimarum in duabus partibus decimalibus, quas Monasterium consueuit recipere ab antiquo, per violenciam eiecisset, et petebant restitutionis sibi commodum impertiri, secundum quod priuilegiata esse dinoscitur spoliacionis questio. iusticia naturalj et Canonicis sanctionibus premunita. Quia vero sepedictus Rector sine clipeo et armis communitus comparuit coram nobis, nos||
simplicitatj parcentes alium diem ad mensem dimidium eisdem partibus duximus deputandum, in quo die, sicut prius factum fuerat, ipse revs inermis omni modo veniebat. et nos tunc concepto consilio saniorj. ad Capitulum et presentiam domini nostri||
episcopi remisimus ipsas partes, si forte melior eiusdem littis decisio fieret coram ipso. Cum autem nec ibi, scilicet in Capitulo, dictj Rectoris simplicitas expedirj valeret, ad nos iterum sub certa forma remisse fuerunt de bono animo ipse partes. et unius diei concordiam acceptarunt, in quo coram nobis legitime comparerent. Vnde cum tercio fuissent in nostra presentia constitute. ac ipse abbas cum suis fratribus personaliter affuisset, procurator sepe memorati abbatis et Ecclesie Sytanst. a peticione premissa nullatenus deuiabat, sed dom. Jo. sepefatus sicut bis prius fecerat, ita et tunc simplicitatem suam non deseruit, omni responsione canonica destitutus et in vocem appellacionis prorumpens dixit, quod propter sue patronum Ecclesie ad nullam responsionem valeret habere progressum, et ita a judicio infecto negocio, contumaciter declinauit. Nos autem inspectis cause meritis, ad jnstanciam actorum probationem admisimus, super possessorio et spoliacione premissis, et ipse abbas per duos de fratribus sui monasterij ydoneos et seniores fide dignos, ac per quatuor laycos omni exceptione maiores. et instrumenta donacionis et confirmationem apostolicam. juramentis exhibitis, legitime comprobauit. possessionem quadragenariam, nullo umquam tempore interruptam et spoliacionem per dom. Johannem Rectorem Ecclesie de Svnlburch, violentissime sibi factam. Nos igitur auditis propositis et improbacionibus, tam canonice nobis factis, In nomine patris et filij et spiritus sancti, pronunciauimus in scripto et diffinitiua sententia restituimus abbatem et fratres Monasterii predictj manualiter in possessionem vel quasj decimarum minorum, in duabus partibus decimalibus Parochialis Ecclesie Svnlburch saluis eisdem, scilicet domino abbatj et suis fratribus omnibus questionibus de perceptis et condempnacione debita facienda. Actum et datum in Styria aput Ecclesiam sancti Egidij. X. kl. Maij. Ab incarnacione domini M°. CC° LXX° quinto.

Source Fulltext: RAAB, Seitenstetten (=FRA II/33, Wien 1870) S. 92-94