Ich Chunrat der Weichselpech. Tuen chunt allen den. di disen prief sehent oder horent lesen. Daz ich von dem goteshaus von sytansteten. ze ouenpach ein Mule vnd ein Hofstat ze purchrecht enher gehabt han. vnd mit verdahtem muet. mit guetem rat. vnd mit gantzem willen meiner swester alhaiten. vnd irr sune. Rugers. Charleins. Hainrichs. vnd irr Tochter Chunegunten vnd Tveten. vnd mit aller meiner vreunt willen vnd gunst die selbe mule vnd die selbe Hofstat auf gegeben han willichleichen vnd ledichleichen, do ich iz mit reht wol getuen macht, dem selben goteshaus von sytansteten, meiner sele vnd aller meiner vodern selle ze hail vnd ze trost. vnd mir wider daz selbe gut von dem selben goteshaus gelihen, alain ze meinem leibe ist, mit solhem gelub. daz ich daz selbe guet haben schol vntzen an meinen tod. vnd die weil niht verchummern schol mit chainer sache, vnd schul all jar do van dinen setzich phfenninge wienner munzze, als ich enher getan han. vnd swenne ich stirbe, so ist zehant ledich der selbe mule vnd auch di hofstat, dem vorgenanten goteshaus, also, daz alle mein vreunt chain recht vnd chain ansproch an demselben guet haben. Dor vber ze vrchunde gib ich disen prief. der bestetiget ist mit meinem Insigel. vnd mit der edelen heren jnsigel Hern Chunrates von Svmerowe. Hern fridriches von hausekke. vnd hern Ottens von schala. vnd sint des gezeuge. her hainrich von harowe. pilgrein der purchraf auf zelkinge. Guetman von amsteten. vlrich von waidhouen. Her hainrich der pfarrer von Celkinge. Hainrich der Reinsperger. Wolfhart von sytansteten. Ditrich der zaucher. Meinhart der Schreiber. Neithart vnd ander pider manne vil. vnd ist daz geschehen datz Celkinge, vor dem erbern herren apt Chunraten von Sytansteten. Noch vnsers herren jesu Christi geburte. vber Tausent Jar. zweihunder jar vnd vier vnd Nevntzich jar. an sant Remigin Tag.

Source Fulltext: RAAB, Seitenstetten (=FRA II/33, Wien 1870) Nr. 116-117