Wir Chunrat von Gotes genade. apte datz sytansteten und diu samenuge vnser vrowen des selben goteshuses. Tun chunt allen den. di nv sint vn hernach chunftich werden. Daz hainrich von holtzinge zv vns chom. vn vns ermant mit siner hantueste. deu im gegeben was von vnserm goteshuse. vnd von dem ersamen apte Rudolfen, daz er vn sin pruder Chunrat daz guet zeholtzinge. zwai lehen. von vns hieten ze rechtem erbe reht. wand sev daz selbe guet von rauchem walde erbowen hieten. mit der weschaidenhait. daz seu alle jar vnserm goteshaus da von dinen solten an sant Gorgen tag funfzehen phfenige. vn an vnser vrowen tage ze dinest zeit funfzehen phfennige, vnd swenne seu verchauffen wolten, daz selbe erbe recht. so solt der da hin gebe. vns geben drizzich phfennige. vnd der da chauft drizzich phfen. vnd scholten auch daz selbe erbe recht niemen ze chauffen geben. wand vns oder ainem vreien paumane. der niemens aigen wer. oder vnsers goteshauses wer. vnd wanne Chunrat. hainrichs pruder willichlich von dem selben erberecht gestanden ist. so hab wir hainrich den prief ernewet. daz er vnd sine Chint. vnd alle sin erben. daz var genant guet ze rechtem erberech ewichlich von vnserm goteshaus haben schuln in dem Cinse vnd dem rechte, als vor an disem prief gescrieben vnd gesprochen ist. Dar vber hab wir in gegeben disen prief. ze ainem ebigen vrchunde. gevestent mit vnsern insigeln. Des sint gezeug. her hainrich von harowe. harman der Neunberger. Alram der stiller. friedrich der hofmaister. Ekkel sein pruder. friedrich von hefte. Chunrat der leitinger. Ernst der scriber. vnd ander pider leut. Daz ist geschehen do van unsers herren geburte waren. Tausen jar. zwai hunder iar. dar nach in dem Neun vn neunzigisten iar. an sant peters abent. Dar zu sol man auch dannoch vurbaz wizzen. daz der vargenant Hainrich vnd sin erben, oder wer daz vargenant guet inne hat. ze recht sten suln vor vnserm ammanne. vnd pantaidinch vnd stiftunge vor im auch suechen schulle. vnd swenne der hertzog. der landes herre ist. oder swer zden selben Zeiten landes herre ist. ain her steur oder ander steur durich des landes not. an vns vordert. dar zu suln si vns steuren nach ir staten. als ander, die erbereht von vns habent. Ez stet auch an der hantvest. Ob Hainrich vn sin erben den Cins verhabten. daz si in niht geben zten tegen. als an ir hant vest gescriben ist. so solen sev an dem nehsten tage daz wandel mit dem eins geben Sechzich phfennige. saument seu daz. so habent seu ir recht verlorn an dem vargenanten guet. So seu auch stiftunge vnd pantaidinch vor vnserm ammanne niht suchten. So sint siv vns schuldich setzich phfenninge ze wandel. vn habent ir recht do mit niht verlorn. Daz ist ein gegen scrift vn ain vrchunde gen ainer hantvest. die wir vnserm holden. Hainrich von Holtzinge gegeben haben.

Source Fulltext: RAAB, Seitenstetten (=FRA II/33, Wien 1870) S. 123-125