Ich pernhart vnd Hainreich, van Gesnitz wier paid prueder. Tuen chvnt allen den, die diesen prief sehent oder hoerent lesen. die nv sint, oder her nach chvmftig werdent, Datz wier||
mit verdachtem muet vnd mit gutleichem willen, vnd auch nach vnserer vreunt rat. den hof, der do haizzet an dem mairhof in chalmvntzer pharr, der vnser aigen was, vnd chvnratz des Mairhofer hausvrowen, vrowen Agnes. dev auch vnser aigen was. mit allen ieren erben, die nv sint. oder her nach van ier chvmfttig werdent. auf gegeben haben vnser vrowen datz Seytensteten, vnd ierem gotshaus. mit solicher weschaidenhait. daz wier der vorgenanten aigenschaft. des vorgeschriben gotshaus gewer wellen sein, als lants recht ist, fuer alle erben, die nach der selben aigenschaft gehorent. wer auer daz, daz daz vorgeschriben gotshaus datz seytensteten iemand ansprach vmb die vorgenante aigenschaft paider leut vnd guet. daz schulle wier dem selben gotshaus auz richten an alle seine mve, vnd allen seinen schaden. vnd schol auch iz daz haben auf alle dev, vnd wier haben, vnd daz der red stet vnd vnzebrochen weleib, geb wier dem selben gotshaus disen prief ze vrchvnd westaetigten mit vnser paider hangvnden insigel. Des sint zevg, her Hainrich van Cinzendorf, Her Hertneid van Liechtenwinchel, Ott vnd pernhart sein svn — wernhart van schafferueld. Hainreich der schenkch van dobra. Rueger van zauch — Alram van Reikerstorf. wolfker vam wasen. Marichhart van Luestnich. vnd ander piderwe leut genvech. Datz ist geschehen datz Seytensteten. Do van Christes gepuert ergangen waren. Tausent iar. drevhundert iar. vnd dar nach in dem fvmfzehenten iar. An vnser vrowen tag ze der Liechtmesse.

Source Fulltext: RAAB, Seitenstetten (=FRA II/33, Wien 1870) S. 158-159