Fridericus. Dei gratia Romanorum Rex. Semper Augustus. vniuersis sacri Romani Imperij Fidelibus. presentes litteras inspecturis, graciam suam et omne bonum Regalis honoris sublimitas prouida meditacione gubernans Imperium. sublimioris fastigij suscipit incrementa, et eius immensitas per orbem latius predicatur, dum pollentes viros, bonorum operum sectatores exquirimus, et eisdem grate familiaritatis beneuolenciam inpertimur, Nam ex eo utique Imperium nomen nascitur gloriosum. et in tempore oportuno sumit obsequia fructuosa.. Sane cum venerabilis Gundacherus. abbas Monasterij in Sytansteten. Ordinis Sci. Benedicti, in sincere dilectionis et fidei puritate continue nos et sacrum Romanum veneretur Imperium, amatorque virtutum existat, prout nobis, ad huc in moribus constitutis, constitit, et nunc laudabilis fame preconium nos informat, Nos in ipsius probitatis operibus delectati, ipsum in Capellanum et familiarem nostrum specialem libenter. liberaliter et desideranter duximus assumendum. Et quoniam non sunt indigne ab omnibus venerandi, quibus regius fauor fauet, per quosque regalis decoratur curia, quique in domo regia ambulant cum consensu. vniuersitatem vestram. in genere ac inspecie, attente requirimus, et rogamus, volentes pariter et mandamus, quatenus eundem Abbatem tanquam nostrum Capellanum specialem. pro nostre peticionis reuerencia. studeatis vbilibet prouenire fauoribus, et honoribus prosequi graciosis. Non permittentes ipsum quem cum omnibus bonis suis in nostram et Imperij protectionem suscipimus. in persona. familia sine rebus suis, iniuriarum molestacionum. seu grauaminum oneribus pregrauari. In hoc Celsitudini regie exhibebitis obsequium bene gratum. volumus eciam, et exspeciali gracia predicto . . . abbati benignitate regia fauorabiliter indulgemus, ut si alicui aut. aliquibus ex uobis contra ipsum abbatem aut suum Monasterium aliqua competat actio, aut competere videatur, coram nobis aut nobis absentibus, coram . . . fratribus nostris illustribus Ducibus Austrie et Styrie aut coram . . . Marscalco austrie, qui pro tempore fuerit, dumtaxat ius suum exigat, et requirat, et per omnia prosequatur. Datum Styre IIII°. Non Marcij. Anno domini M°. CCC°. XVIIII. Regni vero nostri anno Quinto.

Source Fulltext: RAAB, Seitenstetten (=FRA II/33, Wien 1870) S. 164-165