Ich Gotfrid Purchraf ze Chunratshaym vnd meins herren von Freising Lantrichter vber daz gut in der gebiet vmb Waidhouen gelegen, vergich offenlichen vnd tun chunt allen den. di disen brief an sehent oder horent lesen, di nv sint vnd hernach chunftig werdent. Daz ich mit verdachtem mut. vnd mit mit meiner wiertinn. vnd aller meiner erben hant, gunst vnd gutem willen vnd mit rat meiner vreunt, dem erbern herren Abt Gundachern ze Seytensteten vnd dem Gotshaus da selb. Daz Lehen an dem Puchberg mit samt dem zehenden vf dem selbem lehen. vnd dar zv den zehenden datz Otten vf dem graben, mit allev dev vnd dar zu gehort vnd gehoren sol, gesucht vnd vngesucht. gebown vnd vngebown. vnd mit allem dem recht. vnd ich mit samt meinen erben daz vorgeschrieben gut in nutz vn in gewer ze rechtem lehen von im vnd von dem Gotshaus ze Seitensteten inn gehabt han. vfgeben vnd verchouft han, vmb vierzich phunt wienner phenning. der ich gentzlichen vnd schon gericht vnd gewert pin. Daz daz stete vn vnzeprochen vnd an alje ansprach sey. vnd ewichlichen belibe. dar vber gib ich dem vorgenanten Abt Gundachern vnd sinem Gotshaus ze Seitensteten disen offen brief. versigelten mit meinem anhangenten jnsigel, zu einem vrchunde der gantzen warheit, Des sint gezeug. Her Chunrat der Pharrer ze jbsitz. Peter der Drichopf. Johans der Chutteluelder. Purchart der Newnburger. Dittrich der zechmaister. wittige purger ze waidhowen. Michel vnd Bechwein von winden, vnd ander erberer leut genuch. di da by waren. Daz ist geschehen ze Seitensteten, do ouch der brief ist geben. Nach Christes geburt Tousent driv hundert jar. vn darnach in dem drey vn zwainzkisten jare, an sand Johanns abent ze Sunewenten.

Source Fulltext: RAAB, Seitenstetten (=FRA II/33, Wien 1870) S. 171-172