eReligiosis et in christo venerabilibus Confratribus et dominis colenissimis, domino Engelschalco Abbati. Priori. Totique Conventuj ecclesie sce. Marie in Seydensteten. Ordinis sci. Benedicti, Patauiensis dyocesis frater vlricus dictus abbas, totumque collegium fratrum monasterij vallis dej. Ordinis cisterciensis dicte dyocesis. Cum sincera karitate et affectu salutem in filio virginis gloriose. Cum secundum apostolum karitas sit vinculum perfectionis, quo membra singula in corpore sancte ecclesie sibi inuicem coniunguntur et Christo suo capiti solidius uniuntur, ad participandam ab ipso et in ipso spiritualium influenciam graciarum, proinde tanto liberalius et libencius sinum karitatis expandimus et in ampliande confraternitatis consorcium dilatamus, quanto ad participacionem huiusmodi salubrius et efficacius capiendam feruencius anhelamus. Religionis igitur nec non et honestatis vestre fama illecti propensius et attracti sub vestra confraternitatis vnione omnium suffragiorum et bonorum in oracionibus, vigilijs, ieiunijs et elemosinis, ac aliis quibuslibet sanctis exercicijs, que fauente domino in nostra perpetuo fuerint ecclesia, vobis presentibus et futuris, in vita pariter et in morte, presencium testimonio consorcium plenum damus, Adicientes, vt quam primum obitus cuiusquam vestrum nobis nunciatus fuerit, debitis solempnitatibus vigiliarum et misse communis, vel alijs quibuslibet, que pro hostre ecclesie filijs consueuerunt, in omnibus obseruatis, vobis plene ad omnia teneamur, volentes vos ad eque vicissitudinis reconpensam in omnibus et singulis obligarj. Datum in valledej anno domini M°. CCC°. Sexagesimo tercio, quinto kalendas maij.

Source Fulltext: RAAB, Seitenstetten (=FRA II/33, Wien 1870) S. 244