Ich Chunrad von flachenekk vnd ich Ott sein pruder, vnd ich Chunrad von Awra. vnd ich Hans von Saewsenekk. vnd ich Ruger zawchinger. vnd ich Hans in glaeuss. vnd ich Lienhart von Hersdorf. wir vergehen mit dem offenn brief, Daz vns vnd menigern andern sein vnd seins Gothhaus man, der wirdig geistleich her abbt Engelschalch ze Sytanstetn für sich vordert vn pat gegen Sytanstetn, daz wir ain recht erchennen vnd sprechen da solten czwisschen den czwain erbern chnechtn Hansen des Snekkenrowter an aim tail, vnd Hansen des Tesschelperger, vnd seinem ohaim Ruppel dem czaendel am andern tail, vmb den hof ze Prumleitten, vnd dar zu gehort, der von ihm vnd von dem genanten Gotshaus ze lehn ist, nach paider tail furleg. daz habn wir getan, als verr, daz die chrreg mit paider tail wilchur nach vier erbern mann rat, di dar zu benant sind, ze tragen vnd gericht sulln werden. Da vragt vns der genant her Abbt Engelschalch, er hiet vil vngemachs vnd etwenn zuspruechh von chriegigen lehn, wie er di furbaz leichn solt, daz er vnd sein Gotshaus des vnentgoltn belibn. Da ertailt wir all gemainlich auf vnser ayd. vnd trew, daz vns recht zam, vnd auch recht ist, Chumt ain man, der des wert ist, für in oder ainn andern herrn, vnd spricht, her ew sind lehn ledig worden, di sind mich anerstorbn, vnd sult auch mir di rechtlich leichn, pit ich ew, daz ir mir di leicht, da sol der her nicht lenger waygern, nur er leich im mit solichen warten. Ich leich dir alles, daz ich dir rechtleich an den lehn leichen sol. Chumt dar nach der wydertail, vnd vordert auch in der weys. als der vorder, dem sol er auch leichn als dem erstn, also daz er im vor chunt schol tun, wie vnd wem di lehn ee gelihn sein, vnd sol sein trew dar vmb nemen, wann er im wider disem tail teeg fur sich vnd fur sein man darvm geb, daz er die besuech, sust leich er im nicht vnd gech auch im nicht lehns. So daz gehaizzen wirt vnd gelichn, so sol der her teeg inner iars vrist darvmb gebn fur sich vnd fur sein man, was er lenger verczug an ehaft not, da tet gewalt in, ob es die tail paid, oder ir ainer in der czeit gesuecht, vnd geuordert hietn, sust nicht, vnd schol di teeg paiden tailen chunt machn. chomen di fur, so geschech vor den mann vnd vor dem herrn, oder wen er darzu schafft, daz recht sei. Welicher tail aber nicht cheem, an ehaft not, der schol seine recht verlorn habn an den lehn, wer dar vber dem oder aim andern hern zuspraechh, oder in ze schadn, oder ze mue dar vmb praecht, ez waer mit chost, mit laden fur di hern, oder fur den herezogen, oder in di hofschrann, oder fur den geistlichn gwalt, oder wie daz waer, waz er des schaden naem, den scholt er im allen ablegn. Daz ertail wir all auf vnser ayd vnd trew, vnd gebn auch dar vmb ze vrchund den offenn prief, besigilt mit vnser aller di vor daran geschribn sind, vnd mit wernharts des pernrowter vnd mit Michels des proter, die ez mit sampt vnd ertailt habnt, anhangunden Insigiln. Daz ist geschehen nach Christi gepurde vber dreuzehn hundert iar, dar nach im vier vnd sechczgisten iar, am naesten Suntag vor sand Georig Tag.

Source Fulltext: RAAB, Seitenstetten (=FRA II/33, Wien 1870) S. 245-247