Ich Dytreich der Weydner vnd ich Margaret sein hausvrow. vnd all vnser paider erbn vergehn offenbar an dem gegnwurtign brief. vnd tun chunt allen lewtn, di in ansehnt, lesent oder hornt lesen, Daz wir, als der erber herr her Weykchart der Polhaymer, vnd ander erber lewt mit im, durich vnsers vleizzign pets willn, nach vnserm gutlichm willn, czwisschen dem erwirdign geistlichm herrn dem Abbt vnd dem Gotshaus cze Seydnstetn an ainem tail, vnd czwisschen vnser an dem andern tail, vmb fumfczik pfunt wienner pfennig, di der geistlich man her Erasm der Jesniczer dem Got genad auf ainen sacz pey dem Newnstetlein hat lazzn, mit wolbedachtm mut, nach gutm rat habnt geschaidn vnd gesprochn, wann wir des cze paiderseitt ganczlich hinder sew sein gegangn, irn spruch in rechter vrewntschaft an allez geuaer gern welln stet behaltn, In der beschaidn, daz wir vnd all vnser paider erbn von des obgenanten gelts wegn, daz dem eegenantn Geistlichm herrn dem Abbt vnd dem Gotshaus cze Seydnstetn halbz ward geschaidn, vnd auch von des selbn saczs wegn, dar auf ez gelegn ist, chainen chrieg hinfur in sulln auftun, vn prufen(?), weder mit wartn nach mit werichn. Geschaech awer, daz wir oder all vnser paider erbn in dar vmb inndert dhainn chrieg machtn oder taetn, waz sew dann des schaedn nemment mit recht, di der geistlich herr der Abbt cze Seydnstetn vor seinem Conuent in seinem Chloster pey seinen trewn vnd gewizzn vngeswarn gesprechn vnd bestetn mag, di sull wir in all ablegn vnd widerchern, vnd sulln sew di selbn schaedn habn auf vns vnd auf aller vnserr hab, di wir habn auf wazzer oder auf lant, in vnsers herrn des Herczog cze Ostereich lant vnd gepiet, vnd sulln ir mit irs Vogts hilf da von bechommen, als sew naest mugn, an chlag vnd an furbot mit vnserm vnd aller vnser paider erbn gutlichm willn, vnd dar an soll sew nyemant irrn, wir sein lebentig oder tod, Daz lubn wir mit vnserm trewn in allez stet cze habn. Dar vber czu ainem sichtign vrchund der sache gebn wir in den offenn brief czu pezzer sicherhait versigeltn mit mein vorgenants Dyetreichs des Weydner anhangundm insygel, hinder das sich mein obgenantew wirtinn vrou Margret||
vnd all vnser paider erbn mit gutlichm willn habnt verpuntn, allez daz stet cze habn, daz vorgeschribn stet. Der tayding ist auch geczeug der erber her her Weykchart der Polhaimer, der dar vber oberister spruchman ist gewesn, durich vnsers vleizzign||
pets willn mit seinem anhangunden insygil im an schadn. Der brief ist gegebn nach Christi gepurde vber drewczehn hundert jar, dar nach in dem subenczgisten jar an des heylign herrn sand Florian Tag.

Source Fulltext: RAAB, Seitenstetten (=FRA II/33, Wien 1870) S. 255-256