Ich Janns von Aw, vnd ich Gorig Gatschalchs von Aw, dem Got gnad, sun vnd ich kathrei sein tochter, wir vergechen offennbar fur vns selber vnd fur all vnser eriben, lebentig vnd chumftig, vnd wir tun chund allen laewten, di den brief ansechent, lesent oder horent lesen, daz wir mit wol bedachten mut vnd mit gutem willn, nach vnser nahsten pessten frewnt rat, czu der czeit, do wir ez mit recht wol getun machten, recht vnd redleich haben verchaufft vnd cze chauffen gegeben dem erwirdigen geistleichen vnserm gnaedigen herren Abpt Larenczen cze Sitanstetten vnd allen seinen nachommen vnd gabern daz purchrecht czu wisschleedorf in der pharr cze Sitansteten gelegen, daz dez vorgenanten vnsers vatter Gotschalchs von aw ist gewesen mit aller czugehorung vmb ein gellt, dez vns wol hat genugt vnd dez wir von in czu rechten tagen gancz vnd gar gericht vnd gewert sein warden. Daz selb purchrecht cze wisschlesdorf mit allen rechten vnd nuczczen, di cze hollcz, cze velld, wismad, waid, wazzer, haus vnd hofmarich dar czu gehornt vnd douon bechomen mugen, gestift vnd vngestift, gepawt vnd vngepawt, besucht vnd vnbesucht, hab wir auz vnser nucz vnd gwer dem selben geistleichm herren Abpt Larenczen cze Sitansteten in sein hand vnd gewalt aufgeben vnd ingeantwurt in sein vnd aller seiner nachommen vnd gaber nucz vnd gwer, jn der weis, daz sew domit allen irn frum vnd nucz schullen vnd mugen freyleich schaffen mit besiczen, inne haben vnd niezzen, mit verseczen, mit verchauffen, leichen vnd geben, wem sew wellent, also daz wir vnd all vnser eriben sew dar an weder mit worten noch mit werichen nydert sulln irren. wir verczeichn vns auch ganczleich des obgenanten purchrechtz cze wisschlesdorf mit aller seiner czugehorung, daz alles rechtes purchrecht ist von dem ersamen Gotshaus cze Sitansteten, dem man douon alle iar an vnser frawntag czu der dienst czeit cze purchrecht schol geben dreizzich wienner phenning vnd fumfczechen wienner phenning czestewr vnd dar czu tagwerich, alz ander purchrecht cze wisschlesdorf, des alles vnd aller rechten, di wir dar an gehabt haben, tu wir vns czu rechter furczicht mit dem brief also, daz wir dar vmb wider sew vnd wider all laewt, die daselb purkrecht cze wisschlesdorf werdent inn haben vnd besiczen, chainn chrieg vnd chain ansprach sulln habn noch gewinnen weder mit recht noch an recht. Wir welln vnd schullen auch vmb daz eegenant purchrecht mit aller czugehorung ir recht gwern vnd furstand sein fur all chrieg vnd ansprach an aller stat, wo in dez mit recht not geschiecht, alz solichs chauffes vnd purchrechts recht ist in dem land cze Oesterreich. Gieng in an der gewerschafft icht ab, welherlai schaden sew dann des nement, di ir ainer vnbesworn vnd vnberecht pei seinem trewn gesprochen mag, di schull wir in all ablegn vnd widercheren vnd sie schullen di schaden mit sambt dem hawptgut haben auf vns vnd auf aller vnser hab, eribgut vnd varundhab, di wir inner landz vnd auzzer lands haben vnd gewinnen, auf wasser vnd auf land vnd sew schulln dez allez douon bechommen an chlag, an furbot vnd an allez rechten, so sew nast mugn, vnd in welher herschafft vnd gericht sew vnser hab vnd gut erayschent, di schol in der herr oder richter in antaurten vnd geben alz vil, daz sew der schaden mit sambt dem hawptgut gancz vnd gar gericht vnd gewert werdnt. Daz ist vnser gutleicher will, wir sein lebentig oder tod. Daz di red also staet vnd vnczebrochen bleib, dar vber czu ainem sichtign vrchund der warhait geb wir in den offenn brief, czu pesser sicherhait versigilt mit meim vorgenanten Janns von Aw anhangunden Insigil, hinder daz insigil wir vorgenante geschwistreid Gorig von Aw vnd kathrei mit vnsern trewn an aydes stat gutleich vnd gern haben vns verpunden, alles daz||
stet czehaben, daz an dem gegenwurtign brief geschribn ist, wann wir selb di czeit aygen insigil nicht haben gehabt. Der sach sind auch czewgn dvrch vnser fleizzigen pet willn di erbern Hainreich der czawchinger vnd hanns der Tunsteter mit iren anhangundn Insigiln, in vnd iren eriben an schaden. Der brief ist geben nach vnsers herren christi gepurd vber drewczehen hundert iar dar nach in dem ....

Source Fulltext: RAAB, Seitenstetten (=FRA II/33, Wien 1870) S. 345-346