FELIX episcopus servus servorum dei Dilectis filiis. Preposito et Conventui Monasterii in Oberndorff ordinis sancti Augustini Canonicorum regularium per Prepositum soliti gubernari Aquilegiensis diocesis. Salutem et apostolicam benedictionem. Exposcit vestre devotionis sinceritas quam ad nos et apostolicam geritis ecclesiam necnon etiam vestre religionis sub qua perpetuo domino exhibetis famulatum promeretur honestas ut tam vos quos etiam singulari favore prosequimur, quia Monasterium vestrum, quod ut asseritur inter alia illarum partium Monasteria non modicum insigne et decorum existit et ad illud etiam Canonici de Nobilium genere procreati recipi consueverant condignis honoribus attollamus. Hinc est quod nos vestris in hac parte supplicationibus inclinati, ut tu preposite moderne et successores tui Prepositi dicti Monasterii qui pro tempore fuerint Mitra Annulo et aliis Pontificalibus insigniis necnon Almucio de vario griseo in dicto Monasterio uti ac solemnem benedictionem super populum in eodem Monasterio aliisque locis illi et subiectis adque invitati fueritis post missarum vesperorum et matutinarum solemnia dummodo in benedictione huiusmodi aliquis Antistes vel sedis apostolice legatus presens non fuerit elargiri necnon etiam prefati monasterii Canonoci qui etiam fuerint pro tempore Almuciis de aspriolis similiter uti possitis. felicis recordationis Alexandri pape IIII. prede-cessoris nostri que incipit Abbates et aliis quibuscunque Constitutionibus apostolicis in contrarium editis nequaquam obstantibus tibi eisdem successoribus ac Canonicis auctoritate apostolice de speciali gratia tenore presentium indulgemus. Nulli ergo omnino hominum liceat hanc paginam nostre concessionis infringere vel ei ausu temerario contraire. Si quis autem hoc attemptare presumpserit indignationem omnipotentis dei et beatorum Petri et Pauli Apostolorum eius se noverit incursurum. Datum Lausanne Nonis Aprilis Anno a Nativitate domini Millesimo quadringentesimo quadragesimo nono Pontificatus nostri Anno Nono. Collacionata et auscultata cum originali bulla et expedita et concordat Ja. de Krainburga. (Scriptor): N. Sinavende.

Source Fulltext: Peter Peusquens