Ich Jacob der Euster von Laudek tvn chunt vnd vergihe offenlich an disem brief allen den die in sehent hörent oder ||
lesent, daz ich mit gesundem leib, mit verdahtem můt vnd mit willen vnd mit gunst meiner hausfrown frown Ag- ||
nesen, vnd aller miner erben geschaffet vnd geantwurt han, ze ainem rehtem selgeret den erbern und gaistlichen Herren ||
Abt Chunrat vnd dem Conuent ze Stams vnd allen iren nachomen ewichlich. ains mein gůt, daz gelegen ist ze flaurling auf ||
dem Berge vnd bawt daz do selbs Ruediger, vnd Heinrich vnd sein brueder die gehaissen sint pervaller, vnd gilt ierichlich dreissig ||
pfunt perner meraner mventze, an weisat, die driu pfunt wert mvegent sein. bawns vnd vnrebawns, besůhtz vnd vnbesůhtz vnd ||
mit allen den rehten die da zve gehoerent vnd die ich dar auf gehabt han. in soelher beschaidenhait. daz ich daz selbe gůt in nutz ||
vnd ingwære sol haben vnd besetzen vnd entsetzen diu weil ich lebe doch zu ainem vrchuende daz si in nutz vnd in gwære ||
des selben gůtes chamen sullent nah meinem toet, vnd ez besetzen und entsetzen verwandlen vnd cheren mvegent als ander ||
ir gůt, an chriech vnd an alle anspruch, miner erben gib ich in vnd schaffe ierichlich auf dem selben gůte zwai pfunt geltz ||
Mich svlent auch die vorgenanten Herren nah meinem toet der ob got will selig sol sein mit zehen pfunt geltz der vorge- ||
schriben dreissig pfunt geltz die ich in geschaft han, an welher stat ich starbe in der Herschaft ze Tyrol gen Stams bringen an ||
allen meinen schaden, vnd mich da bestatten mit alle diu vnd da zvo geoert nah irs chloesters gwonhait. Von den andern zehen ||
pfunt geltz der vorgeschriben dreissig pfunt geltz, sol dem Conuent, vmb zehen pfunt perner ain bitantz gegeben werden ||
ierichlich an meiner iarzeit vnd die andern zehen pfunt geltz auch von den vorgeschriben dreissig pfunt geltz vnd swas des ||
vbrigen ist mvegent si anlegen wie ez dem Chloester aller nvetzlich ist des gan ich in wol durch meiner sel vnd aller ||
miner vodern sele wille. Vnd daz in daz state vnd vnzebrochen beleibe, gib ich in disen brief versigelt mit meinem Insigel ||
vnd mit meins vettern Insigel Heinrichs des Eusters von Verenstain vnd mit Wernhers von Wens Insigel die bei disem ||
geschaft, gewesen sint. Des sint gezuig bruder Heinrich der weinchelner vnd brůder Berhtolt der Probst mvenich ze Stams, ||
vnd erhart Stoeltzel von Laudes. Daz ist geschehen do von Cristes geburt ergangen warn driuzehenhundert Jar di nah in ||
dem sex und vnd vierzigistem Jar an sand Gregorien tag.